Pơma dơnuh tơ̆ jơ hop akŏm, kơdră chĕp kơ̆l dôm anih tơm, anih jang hlôi tơblang hơdăh găh tơdrong lơ̆m teh đak păng apŭng plĕnh teh, dôm ƀai hŏk hlôh vao păng hơnăp jang vă hơmet pơ lơ̆ng mơmat tat, tơhlăk tơhlĭn ăn anih mơdro sa, kon pơlei, pơtrŭt pơm tơlĕch, tĕch mơdro, pơm tơdrong jang sa ăn kon pơlei.

Pơtôch jơ hop akŏm Thủ tướng Phạm Minh Chính pơma hơdăh, jang kiơ̆ kơjăp Tơdrong tơchơ̆t hop akŏm XIII kơ Đảng, tơdrong chĕp kơ̆l, pơgơ̆r đơ̆ng TW, đơ̆ng Anih tơm Chĭnh trĭ, đơ̆ng kơdră chĕp kơ̆l dơnơm, tơdrong jang hơtŏk tơiung mŭk drăm tơpôl 2021 - 2030, dôm Trong tơlĕch jang 5 sơnăm jăl jang 2021 - 2025, dôm tơdrong tơchơ̆t đơ̆ng Khŭl kơdră teh đak, Thủ tướng teh đak vă pơm hơdăh ‘lơ̆ng jing trong tơlĕch jang, trong jang bơ̆jang kiơ̆ đơ̆ng rim kơdră, rim anih jang. Tŭn pran kơtơ̆ng ang tơroi tơbăt, mă loi ‘noh jĭ tơroi tơbăt trong jang tơgŭm; hơtŏk ‘lơ̆ng đei yua tơdrong jang krao hơvơn kon pơlei; bơ̆jang kiơ̆ ‘lơ̆ng tơdrong kăl kon pơlei pơm tơm tơ̆ tơring; hơmet ming grŭp tơgoăt tơgoăl đĭ đăng hơdrĕch hơdrŭng.