Tang măt ăn Jơnŭm pơgơ̆r teh đak, Thủ tướng teh đak bơ̆n Phạm Minh Chính pôk bơnê kơ dôm tơdrong hơdrin păng tơdrong jang đei jơnei đơ̆ng dôm anih jang tơm, rim tơring; tơdrong pơgơ̆r kơjăp đơ̆ng rim bơngai jang lơ̆m Jơnŭm pơgơ̆r jang kơ Teh đak; tơgop kăp gĭt đơ̆ng khul Kŏng an kon pơlei; tơdrong tơgŭm, vang jang hăt hot đơ̆ng kon pơlei, anih jang mŭk drăm. Thủ tướng ră hơdah, sơnong jang lơ̆m khei năr truh noh trăp trĭn hloh.

Gah tơdrong pơgơ̆r đơ̆ng Thủ tướng tơbang hơdah, đơ̆ng khua hŏk trong jang 'nao păng tơplih 'nao gơh hơgei, tơplih kơmăi sô̆ tơguăt kơjăp hăm dih băl, tơplih gah trong jang hanh chĭn păng pơkăp kon bơngai noh dơnơm; Hơtŏk khua hŏk, kơmăi kơmŏk tơplih 'nao hơgei, tơplih kơmăi sô̆ păng Tơdrong jang 06 jing tơdrong kăp gĭt, athei asong jang hơdrol hloh. Thủ tướng pơgơ̆r rim tơring dah tenh kuăng keh đang tơdrong chih tơmơ̆t lơ̆m kơmăi gah vei lăng măt bơngai, teh choh jang lơ̆m tơring, kơchăng hơlen chih akŏm vă 'măn yua lơ 'măng păng pơm ƀônh hiôk ăn tơdrong jang hăm 200 tơdrong jang hanh chĭn kiơ̆ tơdrong pơgơ̆r kơ po.