Kiơ̆ tơroi ah hop akŏm, sơnăm 2023 anih jang đak dâu hơyuh soh hlôi đei jơnei kăp gĭt, mă kăl gah jang tĕch pơdro, lơ̆m tôm anih jang hlôi keh đang păng hloh kơ tơdrong pơkăp jang tĕch pơdro; Tơdrong iŏk yua đei hloh 942 rơbâu tih hlj, tŏk 11,6 rơbâu tih hlj ah sơnăm 2022; pơtoi kơ noh anih jang mŭk drăm tơgop tih tên ăn jên mong kơ teh đak, sơkơ̆t hơdah sơnong kơ Anih jang mŭk drăm dơnơm kơ teh đak, tơgop tih tên hơtŏk mŭk drăm teh đak.

Pơma ah Hop akŏm, Thủ tướng Phạm Minh Chính pơkăl, sơnăm 2024 dôm sơnong jang hơdah đei pơjao ăn Anih jang đak dâu hơyuh soh athei pơm hơdah lơ̆m tơdrong jang kơ Anih jang adoi nhen kơ rim anih jang vă pơgơ̆r jang hơlen. Tôm Anih jang, mă kăl noh đe kơdră kơpal pơtoi vei kơjăp tơdrong tơguăt tơguăl, drơ̆ng minh; hơtŏk tơdrong khĭn tơchĕng, khĭn pơm jang hăm tơdrong hơpơi Pơjing păng Hơtŏk Anih jang Đak dâu hơyuh soh Việt Nam jing anih jang dơnơm kơ anih jang Đak dâu hơyuh soh, đei tơdrong pran gah jên hu păng khua hŏk kŏng ngê̆, tơgop tơ-iung pơjing teh đak pran kơtang, kon pơlei phĭ tơtŏ dơnŏ ‘lơ̆ng.