Đơ̆ng hơtuch sơnăm 2023 truh dang ei, Khŭl kơdră teh đak păng Thủ tướng teh đak hlôi athei akŏm tơmơ̆t jên jang păng khŏm pơgơ̆r tŭn hrĕnh tơdrong jang chô̆ trong tơley 500 kV mạch 3 đơ̆ng Quảng Trạch (Quảng Bình) truh Phố Nối (Hưng Yên), hơdrin vei sơđơ̆ng jang đang hơdrol ‘năr 30 khei 6 sơnăm 2024.

Dôm anih tơm, anih jang, kơdră đảng, kơdră rim tơring hlôi mơ̆t jang kơtang; Grŭp jang Ŭnh điên Việt Nam, Kŏng ti tơm pơtruh ŭnh điên teh đak hlôi akŏm tôch ai, kŭm hăm dôm Grŭp jang, Kŏng ti tơm, anih mơdro sa ƀơm truh, mă loi ‘noh jĭ tơdrong hơdrin đơ̆ng dôm bơngai iŏk jang, anih jang pơtho tơƀôh hăm vă jê̆ 15.000 kang ƀô̆, ki sư, kŏng nhân, bơngai jang tơ̆ dôm anih jang. Truh dang ei, tơdrong tih hlôi đei bơ̆jang kiơ̆. Hrei ‘nâu, dôm anih jang tŏk bŏk akŏm bơ̆jang kơtang hloh, vă hơnhăk tơdrong jang chô̆ trong tơley 500 kV mạch 3 sơđơ̆ng ‘lơ̆ng jang đang ƀlep tơdrong hơgăt ‘năr 30 khei 6 sơnăm 2024.