‘Măng hop akŏm đei pơgơ̆r kiơ̆ trư̆k tuyên ƀar păh tơ̆ Hơnih bơ̆ jang Khul kơdră teh đak hăm 63 dêh char, pơlei tơm găh Trung ương. Pơma pơtôch hop akŏm, Thủ tướng Phạm Minh Chính akhan, đơ̆ng rŏng 10 sơnăm tơlĕch jang kiơ̆ Tơdrong tơchơ̆t 22 hlôi pơjing đei hơyak tơplih tih tên.

Hơnih dơ̆ng chinh trĭ, tơdrong gơ̆h hơgei kơ teh đak đei tŏk kơtang. Tơgoăt tơgoăl apŭng plĕnh teh pơ̆ih să. Teh đak tơplih ‘nao ‘lơ̆ng liĕm, GDP tŏk vă jê̆ 2 ‘măng pơtêng hăm 10 sơnăm hơdrol. Thủ tướng teh đak pơma hơdăh, lơ̆m khei năr pă đunh bơih ‘noh truh jơ ‘năr Hơnih chĕp pơgơ̆r kăl jang keh đang tơdrong hơlen hơdăh, tơroi tơbăt ăn Hơnih tơm Chinh trĭ. Vă atŏk kơtang hloh dơ̆ng tơlĕch jang pơ keh, Thủ tướng athei Hơnih chĕp pơgơ̆r păng Khul chih akŏm iung jang kơtang, hrôih tơbăt hơdăh tơmam drăm tuch luch kơ Tơdrong vă jang, ‘noh pơchoh trong ăn Hơnih tơm Chinh trĭ pơjing đei tơdrong pơrô̆ chĕp pơgơ̆r găh vang mơ̆t hơdoi lơ̆m apŭng plĕnh teh lơ̆m chăl ‘nao.