Dôm năr âu ki, tơ̆ 1,2 tơring găh Pơbăh păng Tây Nguyên đei ‘mi tih, tĕh hơlih, đak lŏk lơ̆p tơ̆ 1,2 anih, ƀơm ưh ‘lơ̆ng truh tơdrong yak vih vât păng tơdrong arih xa kơ kon pơlei; mă loi ‘nŏh tơ̆ trong gre 20 kơdâu klĕch trong krang Bảo Lộc (dêh char Lâm Đồng), đei tĕh hơlih pơm ăn 03 ‘nu linh kanh sat vei lăng tơ̆ trong nơnăm păng 1 ‘nu kon pơlei đei tĕh hơlih kơtĭt. Thủ tướng tĕh đak đei nơ̆r jet gia pơma nuh, pơtruh jơhngâm ơ̆h sơ ‘ngon hăm kơtum kơ tŏng ‘nhŏng ŏh dôm unh hnam đei bơngai răm. Thủ tướng tĕh đak athei Anih pơgơ̆r jang kơ tĕh đak găh tang găn sar bar bar tŏ ‘mi kial kơnê̆ păng chă dŏng tơgŭm bơngai răm, đe ƀok Kơdră chĕp kơ̆l Anih jang, Kơdră vei lăng kon pơlei dôm dêh char kơchăng pơtho tơƀôh, tơlĕch jang mă ‘lơ̆ng, tơtom, đei yoa mưh tang găn, hơmet pơ ‘lơ̆ng hiong răm đơ̆ng sar bar, tŏ ‘mi kial kơnê̆, vei lăng ‘lơ̆ng tơdrong arih păng tơmam drăm kon pơlei.

 Truh vă jê̆ 11jơ gơmăng ‘năr 30/7, khŭl linh kơpal dêh char Lâm Đồng hlôi chă ƀôh hơkâu bơngai răm uơ oei dơ̆ng lơ̆m ‘măng teh hơlih tơ̆ krang Bảo Lộc.  Thoi noh, hơkâu 4 ‘nu bơngai răm đei ƀŭ kơ lơ̆p lơ̆m ‘măng teh hơlih đei ƀôh tơ̆ trong krang Bảo Lộc hlôi đei khŭl linh kơpal dêh char Lâm Đồng chă ƀôh. Yua đơ̆ng ‘mi tih pơdui đunh pơm ăn lơ hơnih teh hơlih tơ̆ trong krang Bảo Lộc păng tơ ter trong gre 20. Ƀơ̆t 2jơ 1 puăt kơ sơ̆, ƀơ̆t mă tŏk bŏk bơ̆jang dăr hơlen lăng, klăih song trong  ăn gre kơdâu păng vang jang hơmet pơ ‘lơ̆ng dôm hơnih teh hơlih vă vei sơđơ̆ng trong nơnăm vih vơ̆t, ưh kơ ê đei ƀôh teh hơlih kơtang pơm ăn 3 ‘nu linh kanh sat vei lăng trong nơnăm păng 1 ‘nu kon pơlei đei teh kơ lơ̆p. Lăp đơ̆ng rŏng kơ đei ƀôh tơdrong, khŭl kơdră dêh char Lâm Đồng hlôi đei măt tơ̆ hơnih âu athei dôm anih jang kơpal hơvơn hloh 300 ‘nu kŭm hăm lơ gre, tơmam tơlĕch jang tơdrong jang dŏng tơgŭm păng tơchă dŏng sar bar.

Tơ̆ apŭng Ea Súp păng apŭng Lắk kơ dêh char Dak Lak, dôm năr âu ki đei ‘mi tih đunh pơm ăn đak lơ̆p lơ chŭn na, ƀa, ƀum hơƀo kơ kon pơlei păng lơ trong nơnăm. Mă hơdăh tơ̆ apŭng Lắk, ‘mi tih pơm ăn đak lơ̆p hlŏh 750 ha ƀa đak kơ kon pơlei tơ̆ dôm xăh Buôn Tría, Buôn Triết, Đắk Liêng păng 1,2 xăh, thĭ trơ̆n nai. Lơ̆m nŏh xăh Buôn Triết dêh hlŏh, hăm hlŏh 320 ha, xăh Đắk Liêng đei 268 ha, xăh Buôn Tría ‘nŏh 106 ha, oei tơ̆ dôm xăh Yang Tao, Bông Krang păng thĭ trơ̆n Liên Sơn dai đei 'mi tih đak lơ̆p 'năi. Oei tơ̆ apŭng sơlam Ea Súp, ‘mi tih đunh dôm năr âu ki, đak lơ̆p lơ jăl trong tơ̆ pơlei pơla, tơ̆ dôm xăh Ea Lê, Ea Rốk, Ea Bung …, lơ chŭn na ƀa đak, pơgar ƀum hơƀo đei đak lơ̆p ‘năi. Khul kơdră pơgơ̆r păng dôm anih jang kơpal tơ̆ dôm tơring lơ̆m dêh char Dak Lak kơchăng tơlĕch lơ trong jang vă tơjră hăm ‘mi tih đak lơ̆p.