Tơ̆ hop akŏm, rim Kơdră kơpal sơkơ̆t hơdah, lăng tơgĭt tơdrong tơbôl kơ 2 anih jang lơ̆m tơring jô̆ đơ̆ng iung jang tơbôl ah sơnăm 1990. ASEAN hmach bơnê kơ tôm teh đak vang jang lơ̆m GCC adoi vang jang kiơ̆ Tơchơ̆t Tơguăt păng Jang hadoi Đông Nam Á, atŭm hăm noh hmach bơnê kơ dôm Teh đak tơring Ả-rập Thŏng nhâ̆t (UAE) jing Teh đak akŏm pơma đam kiơ̆ trong jang ASEAN jô̆ đơ̆ng sơnăm 2022.

Hơyak truh khei năr anô̆ anăp kơnh, Kơdră kơ dôm teh đak ASEAN păng GCC drơ̆ng nơ̆r pơtoi pơma đam hơnơ̆ng, hơmet păng keh đang tơchơ̆t jang hadoi, atŭm hăm noh hơtŏk pran jang hadoi hơtŏ hơnơ̆ng, atŭm pơyua, tơrĕk jang hadoi lơ̆m dôm tơdrong jang mŭk drăm, tĕch pơdro, asong jang, vei sơđơ̆ng tơdrong jang hadoi kơjă ‘lơ̆ng gah đak dơsĭ, vei sơđơ̆ng unh hơyuh, tơmam xa, tơjră hăm tŏ ‘mi tơplih... Hop akŏm hơlen Tơchơ̆t atŭm, tơroi kơ dôm tơdrong đei jơnei lơ̆m pơma đam đơ̆ng Kơdră Kơpal păng tơlĕch tơchơ̆t hơtŏk tơ-iung hloh dơ̆ng lơ̆m tơbôl ASEAN-GCC lơ̆m khei năr truh.