Ah 'măng tơjrâ̆m, Thủ tướng Phạm Minh Chính hmach bơnê kơ 'măng năm tơmang Việt Nam mă blŭng đơ̆ng Ƀô̆ trương Manalo; sơkơ̆t hơdah Việt Nam hơnơ̆ng lăng tơgĭt păng 'meh vă hơtŏk jang tơbôl hăm Philippines roi năr roi đei jơnei tơnăp. Vă pơtoi hơtŏk tơdrong jang tơbôl roi năr roi pran hloh.

Lơ̆m noh tơrĕk hơtŏk asong khul kơpal năm tơmang dih băl, hơtŏk jang mŭk drăm păng tĕch pơdro, đei hloi tơdrong tĕch phe, yuih hŭt lê̆ dôm tơdrong pơgăn ưh kăl păng tơgŭm dih băl vei măh phe xa ƀa sŏng, pơjing cham char tĕch pơdro păng asong jang ƀônh ƀŏ ăn dôm anih jang mŭk drăm kơdih băl; adrin keh đang hrôih tơdrong jang tĕch pơdro kơ 2 păh đei 10 tih đôlar păng hơtŏk jang hadoi dôm tơdrong jang mŭk drăm nai gah mŭk drăm kơsô̆, mŭk drăm jơk, pơ-'lơ̆ng unh hơyuh, tơjră hăm hơyuh tô̆ 'mi tơplih, sek tơlang pơ –'lơ̆ng dôm tơdrong đei ƀôh tơ̆ đak dơsĭ, tơgŭm dih băl hơtŏk mŭk drăm tơ̆ đak dơsĭ, tơplih 'nao tơ-iung pơm jang.