Dang ei, Việt Nam đei jê̆ 910 rơbâu anih jang mŭk drăm tŏk bŏk oei pơm jang hloh 3 'măng pơtêng hăm sơnăm 2011, pơhlom 14,4 rơbâu hơp tak xah păng hloh 5 trĭu unh hnam jang tĕch pơdro, tơdrong jang mŭk drăm tơgop hloh 60% GDP, pơhlom 30% kơsô̆ bơngai oei tŏk bŏk pơm jang. Dôm anih jang mŭk drăm, bơngai jang tĕch pơdro đei măt tơ̆ tôm tơdrong jang, tơdrong tĕch pơdro ưh hơdrô̆ lơ̆m teh đak mă lơ anih jang mŭk drăm, bơngai jang mŭk drăm hlôi sơkơ̆t đei kơjă kăp gĭt kơ hơnăn po ang bang lơ̆m tơring păng lơ̆m kơpal teh.

Pơma ah jơ lêh, tang măt ăn Jơnŭm pơgơ̆r teh đak, Thủ tướng pôk bơnê kơ dôm tơdrong tơgop kăp gĭt đơ̆ng khul jang tĕch pơdro, bơngai mơlôh jang mŭk drăm Việt Nam lơ̆m tơdrong tơ-iung pơjing păng hơtŏk teh đak. Atŭm hăm noh adoi pôk bơnê kơ Jơnŭm bơngai mơlôh jang Mŭk drăm Việt Nam hlôi tơguăt, pơgơ̆r, chơng 'nhăk đe mơlôh jang mŭk drăm lơ̆m 30 sơnăm kơ âu. Thủ tướng ră hơdah, Jơnŭm pơgơ̆r teh đak băt hơdah, vang tơmơ̆ng păng pơtoi đei lơ trong jang vă tơgŭm ăn khul jang mŭk drăm găn hloh tơnap tap, yak hơtaih hloh dơ̆ng adoi nhen pơtoi yak hadoi, tơgŭm vă Jơnŭm bơngai mơlôh jang Mŭk drăm pơtoi hơtŏk tơ-iung pran kơtang.