Pơma ah lêh akŏm, rim bơngai tang măt Hoa Kỳ hmach bơnê kơ Thủ tướng Phạm Minh Chính păng khul kơpal teh đak Việt Nam truh Hoa Kỳ păng đei dôm tơdrong jang 2 pah tơnăp, tơpăt jue. Gah Hoa Kỳ sơkơ̆t hơdah đei tơdrong pơdrơ̆ng đơ̆ng pơđĭ 2 đảng Dân chủ păng Cộng hòa lơ̆m tôm jơnŭm pơgơ̆r teh đak păng Kuôk hô̆i lăng tơgĭt tơbôl hăm Việt Nam, tơgŭm Việt Nam “pran, rơngei, jơnap păng hơtŏk tơ-iung”.

Thủ tướng Phạm Minh Chính hlôi tơroi lơ̆m 'măng năm tơmang hlôi đei lơ tơdrong pơm jang, pơma đam hăm dôm tơring păng anih jang mŭk drăm Hoa Kỳ, mă kăl gah tơdrong jang kơmăi kơmŏk 'nao, ƀán dẫn. Thủ tướng chơt hơ-iă hăm tơdrong kơ-'nôh đơ̆ng dôm anih jang mŭk drăm pran kơ Hoa Kỳ pơtoi pơih să asong jang, pơm jang hadoi hăm Việt Nam păng drơ̆ng nơ̆r 2 pah kăl hơtŏk pran tơlĕch jang tơnăp vă hrôih đei trong jang tơpă pơyua hloh.