'Nâu jing tơdrong akŏm pơma đam hơdrô̆ đei WEF pơgơ̆r lơ̆m Hop akŏm vă tơroi găh tơdrong hlôh vao đơ̆ng Việt Nam nhen minh um rŭp kăp gĭt găh hơmet hơtŏk mŭk drăm păng tŏk bŏk drŭt kơtang tơdrong hơtŏk tơ-iung, pơm trong hiôk vă tơroi găh dôm tơdrong tơchơ̆t pơm jang păng axong jang  – tĕch pơdro tơ̆ Việt Nam. Pơma tơm tơ̆ Hop akŏm, Thủ tướng Phạm Minh Chính tơroi găh tơdrong jang hơtŏk mŭk drăm – tơpôl Việt Nam, ră hơdăh 'noh mŭk drăm pơm jang hơtŏk pran mă oei lơ̆m khei năr tơnap tap, Việt Nam hlôi tơjră tơnăp hăm dôm tơdrong hrat hrĭn đơ̆ng 'nguaih, vei xơđơ̆ng tơdrong jang mŭk drăm, hơlen găn huach kư̆ kă păng vei xơđơ̆ng dôm tơdrong hơtŏk tơ-iung, hơmet kơjăp vei xơđơ̆ng tơpôl, tơdrong rơngei xơđơ̆ng ăn hơtŏk tơ-iung. Việt Nam tŏk bŏk pơtoi tơplih 'nao pran kơtang găh trong pơm jang, hơmet pơ 'lơ̆ng mŭk drăm, hơtŏk tơplih 'nao păng jang kiơ̆ kih thuơ̆t sô̆, hơtŏk pran tơdrong tơplih jang unh hơyuh, hơtŏk mŭk drăm hlăng hơdjă, mŭk drăm xơđơ̆ng. Thủ tướng teh đak pơkăl WEF păng dôm teh đak vang jang pơtoi jang hadoi, tơgŭm Việt Nam găh kơmăi kơmŏk, jên hu, pơtho bơngai jang gơh rơgei kiơ̆ trong tơlĕch jang 'nao.

Kơsơ̆ năr au mơ̆n, Thủ tướng Teh đak Phạm Minh Chính hlôi sơng pơma hăm ƀok Robert H. McCooey, Jr., Kơ iĕng kơdră chĕp pơgơ̆r Grŭp jang Nasdaq (Mi). Thủ tướng bơnê tơdrong lăng ba tơgŭm djru đơ̆ng Nasdaq hăm hơnih mơdro sa Việt Nam, ‘meh vă Nasdaq pơma dơnuh, tơbăt hăm Việt Nam găh trong jang jên hu kơ rim teh đak pơdrŏng, găh trong jang jên hu lơ̆m plei teh, tơbăt dôm trong jang hơ iă tơgŭm atŏk tơ iung bơ̆ jang jên hu lơ̆m teh đak, hơnơ̆ng yak hơdoi hăm tơdrong atŏk tơ iung kơ rim hơnih mơdro sa Việt Nam. Kơ iĕng kơdră chĕp pơgơ̆r Grup jang Nasdaq pơma tơbăt jơhngơ̆m đon hơ iă hăm tơdrong iŏk đei jơnei lơ̆m hơmet ming păng atŏk muk drăm Việt Nam, hôn bơnê kơ tang trong bơ̆ jang jên hu đơ̆ng Khul kơdră teh đak; lui kơjăp lơ̆m tơdrong atŏk tơ iung hơbĕch hơbal kơ rim hơnih mơdro sa Việt Nam; pơkăp tơgum djru rim hơnih mơdro sa Việt Nam atŏk tơ iung tơtŏ lơ̆m plei teh. Kơ iĕng Kơdră chĕp pơgơ̆r Grŭp jang Nasdaq hơpơi đei sơng Thủ tướng Teh đak năm tơmang lăng Hơnih bơ̆ jang mơdro sa chư̆ng khoan Nasdaq lơ̆m khei năr hrôih hloh.

Adoi lơ̆m 'măng Hop akŏm WEF Thiên Tân, kơsơ̆ năr 26/6, Thủ tướng teh đak bơ̆n Phạm Minh Chính hlôi xơng Giáo sư Klaus Schwab, Bơngai pơtơm păng adoi jing Kơdră pơgơ̆r WEF păng bơ̆ng pang lêh kĭ Hla bar pơkăp jang hadoi (MOU) Việt Nam – WEF jăl xơnăm 2023-2026. Thủ tướng ră hơdăh Việt Nam gô pơtoi xơkơ̆t hơdăh tơdrong xơđơ̆ng jang mŭk drăm păng hơtŏk tơ-iung. Thủ tướng pơkăl WEF pơtoi yak hadoi atŭm hăm Việt Nam, pơtoi tơgŭm tơroh hăm dôm anih jang mŭk drăm lơ̆m WEF, tơgŭm Việt Nam hơvơn axong jang 'lơ̆ng kơjăp, mă kăl noh găh tơdrong jang kơmăi kơmŏk 'nao, tơplih jang unh hơyuh, tơplih jang kơsô̆, hơtŏk pơma dơnuh. Thủ tướng adoi pơkăl WEF tơroi găh dôm trong hơtŏk tơ-iung lơ̆m kơpal teh, tơlĕch tơgŭm Việt Nam hơtŏk tơdrong tơgar jang, hơmet pơ 'lơ̆ng axong jang – tĕch pơdro, pơtrŏ hăm dôm tơchơ̆t tơlĕch jang 'nao.