Hop akŏm đei pơgơ̆r kiơ̆ pơkăp trư̆k tuyê̆n tơ̆ Anih jang kơ Jơnŭm pơgơ̆r teh đak pơtoi hăm 9 dêh char đei trong tơlei găn ga. Lơ̆m hop akŏm, kơdră kơ dôm anih jang tơm, rim tơring, anih jang đei tơrĕk, tơroi gah tơdrong iŏk jang; tơroi kơ dôm tơdrong tơnap tap, tơhlăk tơhlĭn ; tơlĕch dôm sơnong jang vă dôm tơdrong jang gơh hiôk hian hloh.

Sơkơ̆t hop akŏm, Thủ tướng teh đak bơ̆n Phạm Minh Chính ră hơdah, dôm anih jang, rim tơring jang kơjăp hăm dih băl păng hăm kon pơlei, anih jang mŭk drăm kơyuơ tơchơ̆t atŭm, tang găn đei tơdrong kơnê̆, xa pơjĭp lơ̆m tơdrong tơlĕch jang, atŭm pơm jang, atŭm đei jơnei, păng atŭm pơyua. Rim tơring tenh kuăng hrŭ ‘mong teh iŏk pơm jang, pơjao anih kăl pơm jang vă dui tơlei; tenh kuăng ‘nhăk kon pơlei truh oei anih oei nai păng pơm kiơ̆ tơchơ̆t yông kon pơlei truh anih oei sơđơ̆ng ăn tơdrong dui tơlei unh lơ̆m khei 6/2024.