Vang Hop akŏm đei Thủ tướng, Kơdră dôm khul kơpal kơ dôm teh đak Cam-pu-chia, Lào, Mi-an-ma, Thái Lan, Trung Quốc păng Việt Nam. Thủ tướng teh đak bơ̆n Phạm Minh Chính hlôi đei ƀai đŏk kăp gĭt tơ̆ Hop akŏm. Hop akŏm sơkơ̆t tơdrong jang đei jơnei lơ̆m jang hadoi Mê Công – Lan Thương lơ̆m 3 sơnăm kơ âu păng pơma đam gah trong pơm jang ăn khei năr truh. Rim Kơdră kơpal ră hơdah, dôm tơdrong tơgop kăp gĭt đơ̆ng MLC hăm tơdrong rơngei hiôk hian, jang hadoi păng hơtŏk tơ-iung tơ̆ tơring Mê Công păng lơ̆m tơring, atŭm hăm noh sơkơ̆t pơtoi jang hadoi kơjăp, atŭm dih băl pơjing Jơnŭm jang hadoi khei năr hơnô̆ hơnăp kơnh hiôk hian, jơnap đơ̆ng dôm teh đak lơ̆m Mê Công – Lan Thương. Gah sơkơ̆t jang hadoi lơ̆m khei năr truh, rim Kơdră kơpal ră hơdah trong jang hơdrol hơtŏk tơ-iungnoh iŏk kon pơlei pơm tơm, trŏ ƀlep hăm cham char kon bơngai.

Hop akŏm drơ̆ng nơ̆r hơtŏk pran tơdrong jang hadoi atŭm pơjing Tơring hơtŏk mŭk drăm Mê Công – Lan Thương; hơlen tơdrong pơjing trong hop akŏm, jang hadoi kiơ̆ pơkăp hơtŏk Tơplih ‘nao hơgei Mê Công – Lan Thương. Pơma ah Hop akŏm, Thủ tướng teh đak bơ̆n Phạm Minh Chính ră hơdah, Jơnŭm pơgơ̆r teh đak Việt Nam hơnơ̆ng lăng tơgĭt păng gô pơtoi atŭm hăm Trung Quốc păng dôm teh đak lơ̆m Mê Công hơtŏk jang hadoi Mê Công – Lan Thương roi năr roi hơtŏk pran, đei jơnei păng kơjăp sơđơ̆ng.