Thủ tướng Phạm Minh Chính hmach bơnê kơ Ƀok Shiota Koichi păng Khul kơpal tang măt ăn dêh char Kagoshima năm tơmang Việt Nam trŏ ah năr ƀar teh đak tŏk bŏk oei tơbăt 50 xơnăm iung jang tơbôl Việt Nam – Nhâ̆t. Kiơ̆ kơ Thủ tướng, tơbôl jang hadoi kơjăp Việt Nam – Nhâ̆t tŏk bŏk lơ̆m jăl hơtŏk tơ-iung 'lơ̆ng rŏ.

Teh đak Nhâ̆t pơtoi jing teh đak jang mŭk drăm kăp gĭt hloh kơ  Việt Nam, jing teh đak tơgŭm ODA pran hloh, teh đak axong jang tơmang pơhiơ̆ pran mă 3, jang tĕch pơdro dơ̆ng mă 4 kơ Việt Nam. Thủ tướng akhan, đơ̆ng dêh char Kagoshima păng dôm tơring kơ Việt Nam đei lơ tơdrong pran vă tơgŭm dih băl, mŭk drăm jang hadoi oei tih tên. Thủ tướng pơkăl Ƀok Kơdră dêh char Kagoshima hơvơn rim anih jang mŭk drăm kơ dêh char axong jang lơ hloh truh Việt Nam lơ̆m dôm tơdrong jang mă dêh char jang pran nhen gre hơyuh, điê̆n tưh, choh jang xa, pơtăm tơmam drăm păng tơgŭm jang kŏng ngĭp.