Lơ̆m Kơthơ, Thủ tướng pơma hơdăh: Têt joăt joe Chôl Chnăm Thmây ‘noh tơdrong oei sa joăt joe ‘lơ̆ng rŏ kơ bơngai Khmer, jĭ năr lêh tih hloh lơ̆m sơnăm, tôch kơ gĭt kăl, pơih blŭng sơnăm ‘nao hăm jơhngơ̆m đon lui, hơpơi ‘meh vă, hơvơh hơvơi hơpơi ăn tơdrong ‘lơ̆ng rŏ, hơrih sa phĭ tơtŏ dơnŏ ‘lơ̆ng dơ̆ng kơjăp, hơnŭk hơnoa; jei lơ̆m jơ ‘năr tơbăt ăn jơhngơ̆m đon ‘mêm kơ eng hăm mĕ ƀă yă ƀok.

Ƀlep lơ̆m jơ ‘năr au, tang măt ăn kơdră chĕp pơgơ̆r Đảng păng Teh đak, Thủ tướng pơtruh ăn kon pơlei pơla, kang ƀô̆ păng rim ƀok soi kon pơlei lui khop hơdrung Khmer jơhngơ̆m đon ‘mêm kơ eng, apĭnh jet gia pơma dơnuh ‘lơ̆ng hơ iă hlŏh. Hăm hloh 1 triu 300.000 ‘nu bơngai, kon pơlei Khmer ‘noh mĭnh khul ưh kơ gơ̆h tơpleh lơ̆m kon pơlei pơla rim hơdrung Việt Nam, đei hơnăp jang tôch gĭt kăl lơ̆m tơdrong jang tơ iung pơjing păng vei lăng Teh đak. Thủ tướng athei rim khul kơdră, hơnih jang, tơring tơrang hơmet ăn ‘lơ̆ng rim tơdrong rơvơn ăn kon pơlei Khmer sơng Têt Chôl Chnăm Thmây sơnăm 2024 tơgoăt tơgoăl, chơt hơ iă, ‘lơ̆ng rŏ, sơđơ̆ng, pơkom, trŏ lăp hăm tơdrong hơrih sa ‘lơ̆ng, tơdrong joăt joe sơ̆ ki kơ hơdrĕch hơdrung.