Lơ̆m noh rim anih jang pơgang tơ̆ tơring, tơ̆ dêh char păng rim anih jang khăm hơmet jĭ, pơtâp hơmet hơkâu jăn; khăm hơlen y khoa, hơlen năng phap y păng hơlen năng jơhngâm đon; tang găn tơdrong jĭ, jang pơgang lơ̆m tơpôl; hơlen năng tơdrong ‘lơ̆ng đơ̆ng pơgang, phơ̆ng, tơmam xa, vắc xin păng tơmam pơyoa ăn jang pơgang, kơmăy kơmŏk pơm tơlĕch pơgang, vắc xin, tơmam păng kơmăy kơmŏk pơyoa ăn jang pơgang; vei lăng kơsô̆ măt bơngai – jơhngâm pran mưh rơnĕh kon hơ ‘lơ̆p. 

Trong tơproh trong tơlĕch đon pơhnŏng truh sơnăm 2025 đei tŏ 33 giơng ƀich hơmet jĭ ăn hlŏh 10.000 ‘nu kon pơlei, 15 ‘nu ƀak si ăn hlŏh 10.000 ‘nu kon pơlei, 3,4 ‘nu dược si ăn hlŏh 10.000 ‘nu kon pơlei păng 25 ‘nu điều dưỡng ăn hlŏh 10.000 ‘nu kon pơlei. Trong vă jang truh sơnăm 2050, pơjing 1,2 anih jang pơgang ‘nao ‘lơ̆ng hơtŏ hăm apŭng plenh teh. Pơjing anih jang kơmăy pơm pơgang lơ̆m teh đak jing anih tơm pơm tơlĕch pơgang đei kơjă kăp gĭt. Adrin iŏk đei 45 tŏ giơng ăn bơngai jĭ ƀich hơmet ăn 10.000 ‘nu kon pơlei, 35 ‘nu ƀak si ăn 10.000 ‘nu kon pơlei, 4,5 ‘nu dược si ăn 10.000 ‘nu kon pơlei, 90 ‘nu điều dưỡng ăn 10.000 ‘nu kon pơlei; kơsô̆ giơng ƀich hơmet jĭ tơ̆ hnam pơgang kơdih đei 25% akŏm đĭ đăng kơsô̆ giơng ƀich hơmet jĭ.