Tơ̆ Hà Nội, Thủ tướng Teh đak Phạm Minh Chính pơm tơm jơ bơ̆ jang ƀar păh Khul kơdră chĕp pơgơ̆r Teh đak hăm Khul kơdră chĕp pơgơ̆r Khul hơnih mơdro sa păh ai păng iĕ (SME) găh tơdrong jang kơ Khul, tơpôl hơnih mơdro sa SME păng rim trong hơmet pơ ‘lơ̆ng tơnap tap ăn hơnih mơdro sa.

Lăp đơ̆ng rŏng mơ̆ng Khul SME, rim hơnih mơdro sa păng nơ̆r tơl hơdăh, nơ̆r tơlĕch trong jang đơư̆ng rim hơnih tơm, hơnih bơ̆ jang păng kơdră chĕp pơgơ̆r rim hơnih mong jên, nơ̆r pơma pơtôch jơ bơ̆ jang, Thủ tướng Teh đak Phạm Minh Chính sơkơ̆t hơdăh Khul kơdră teh đak ling lang mơ̆ng, hơlêm, hơdrin vă đei trong jang ăn hơmet pơ ‘lơ̆ng ăn hơnih mơdro sa, nhen jang kiơ̆ rim trong jang tơgŭm djru pơđunh khei năr ăn năm ba thuê̆, jên mơng teh, ưh kơthuê̆, tơjur thuê̆ au to; akŏm hơmet pơ ‘lơ̆ng tơnap tap, pơtrŭt kơtang rim tơdrong jang trăi thiê̆u hơnih mơdro sa, tĕch răt teh, hnam; pơtrŭt kơtang hơmet pơ ‘lơ̆ng trong bơ̆ jang, pơjing rơvơn tơmơ̆t jên jang mơdro sa; tơgŭm djru hơnih mơdro sa hơmet pơ ‘lơ̆ng tĕnh koăng, atŏk tơ iung kơjăp ‘lơ̆ng.