Tơ̆ jơ sơng, Thủ tướng Teh đak Phạm Minh Chính hôn bơnê ‘măng năm tơmang mă ƀar đơ̆ng Kơdră jang tơbôl Brazil năm tơ̆ Việt Nam păng tơbăt jơhngơ̆m đon hơ iă găh teh đak păng kon bơngai Brazil lơ̆m ‘măng năm tơmang ƀơ̆t khei 9/2023 au ki; hôn bơnê kơtang dôm trong bơ̆ jang đơ̆ng Khul kơdră chĕp pơgơ̆r teh đak kơ Ƀok kơdră tơm Lula da Silva vă hơmet pơ ‘lơ̆ng păng atŏk kơtang hơnih dơ̆ng mŭk drăm, chinh trĭ, hơnăp jang hơdrin đơ̆ng Brazil tơ̆ tơring păng lơ̆m apŭng plĕnh teh păng lui akhan, ‘măng năm tơmang đơ̆ng Kơdră jang tơbôl Mauro Vieira gô tơgop pơm hơtŏk loi dơ̆ng tơgoăt tơgoăl Jang hơdoi tôm tong Việt Nam – Brazil; ‘noh hơyak kăl hloh vă tơlĕch jang kiơ̆ rim tơdrong drơ̆ng mĭnh nơ̆r đơ̆ng Kơdră kơpal ƀar teh đak lơ̆m khei năr au ki, mă kăl dôm tơdrong jang mă ƀar teh đak đei, gơ̆h jang păng ‘meh vă, kơ yuơ đei iŏk yua kơ kon pơlei ƀar teh đak, kơ yuơ rơngei hiôk hian, jang hơdoi păng atŏk tơ iung tơ̆ ƀar tơring păng lơ̆m apŭng plĕnh teh.

 Kơdră jang tơbôl Mauro Vieira jei hlôi tơroi tơbăt hăm Thủ tướng Teh đak găh rim tơdrong pơma đam hăm Kơdră jang tơbôl Bùi Thanh Sơn; tơbăt ƀar păh tơlĕch rim trong jang hơdăh păng drơ̆ng mĭnh nơ̆r trong jang hơdoi ƀar păh Việt Nam – Brazil lơ̆m khei năr au kơnh, mă kăl ‘noh lơ̆m rim tơdrong mă ƀar păh kĕ jang păng lăng kơjăp nhen choh jang sa, khoa hŏk kmăi kmŏk, tơplih iŏk yua ŭnh hơyuh rơgoh ‘lơ̆ng…