Iung pơma tơ̆ jơ bơ̆ jang, Thủ tướng Phạm Minh Chính ‘meh vă, jang hơdoi hăm CSIRO kăl đei “tơmam drăm hơdăh” vă oei tơlĕch jang dơ̆ng; lui kơjăp rim tơdrong iŏk đei ƀar păh tŏk bŏk chă tơchĕng hơlen ‘noh tôch kơ ‘lơ̆ng liĕm, kăl atŏk kơtang hloh dơ̆ng.

Thủ tướng hôn bơnê jơhngơ̆m đon ‘mêm kơ eng dih băl đơ̆ng kon pơlei Australia hăm Việt Nam, mă kăl ‘noh rim bơngai khoa hŏk Australia tôch phăl hơlăng, tơbăt hơdăh hơnăp jang kơtang hăm dih băl, tơdrong mă au tơƀôh hơdăh đơ̆ng jơhngơ̆m đon truh jơhngơ̆m đon, măt lăng, jơ̆ng ti jang jei ƀôh hơdăh tơdrong phăl hơlăng ‘meh vă ƀar teh đak atŏk tơ iung. Ƀlep lơ̆m jơ ‘năr au, Thủ tướng Phạm Minh Chính vang năm pơm lêh pơjao Hla bơar ƀlŏk hơdơ̆r ƀar păh Kơdră chĕp pơgơ̆r Hơnih tơm bơ̆ jang Khoa hŏk păng kmăi kmŏk Huỳnh Thành Đạt hăm Kơdră chĕp pơgơ̆r CSIRO Doug Hilton.