Hơnơ̆ng bơ̆ jang lơ̆m ‘măng năm bơ̆ jang vang Hop akom Kơdră kơpal ASEAN - Jơnŭm jang Hơdoi tơring Ving (GCC) păng năm tơmang teh đak pơtao Ả-rập Xê-út, Thủ tướng Teh đak Phạm Minh Chính hlôi năm truh tơ̆ Hơnih bơ̆ jang GCC, tơƀơ̆p Tổng Thư ký GCC păng vang năm Pơm lêh kĭ pơkăp ƀlŏk hơdơ̆r găh jang hơdoi ƀar păh Hơnih tơm jang Tơbôl Việt Nam păng Ban Thư ký GCC. 

Thủ tướng Teh đak Phạm Minh Chính hôn bơnê kơtang hơnăp jang kơ GCC păng sơkơ̆t hơdăh Việt Nam lăng kơjăp tơdrong pơtrŭt atŏk kơtang jang hơdoi đei iŏk yua atŭm hăm GCC păng rim teh đak lơ̆m khul. Thủ tướng pơma hơdăh, Việt Nam drơ̆ng nơ̆r pơm gơng tơroh tơgoăt dih băl, pơtrŭt jang hơdoi ASEAN-GCC, athei Hơnih tơm Jang tơbôl Việt Nam hăm Ban Thư ký GCC hrôih drơ̆ng mĭnh nơ̆r tơdrong jang hơdoi kơjăp vă tơlĕch jơnei Hla bơar pơkăp ƀlŏk hơdơ̆r ‘nao đei kĭ pơkăp dih băl. Găh kơdih kau, hôn bơnê kơtang hơnăp jang păng hơnih dơ̆ng kơ Việt Nam adoi nhen dôm tơdrong mă Việt Nam iŏk đei jơnei. Tổng Thư ký sơkơ̆t hơdăh, Ban Thư ký GCC gô hơdrin tơgŭm Việt Nam pơtrŭt kơtang jang hơdoi hăm rim teh đak lơ̆m khul găh rim tơdrong ƀar păh đei.