Tơ̆ pơma đam, Kơdră chĕp pơgơ̆r Hạ viện Szymon Holownia hôn bơnê ‘măng năm tơmang đơ̆ng Thủ tướng Teh đak Phạm Minh Chính, lăng ‘nou jĭ hơyak tơm gĭt kăl lơ̆m tơgoăt tơgoăl Việt Nam - Ba Lan ƀơ̆t khei ‘năr sơnăm ou pơ đĭ ƀar teh đak pơgơ̆r tơbăt 75 sơnăm pơjing tơbôl (1950-2025). Thủ tướng Teh đak Phạm Minh Chính bơnê tơdrong sơng hơvơn phăl hơlăng đơ̆ng Kơdră chĕp pơgơ̆r Hạ viện Szymon Holownia atŭm hăm rim hạ nghị sĩ ‘măn ăn Khul tang măt Kơdră Việt Nam; sơkơ̆t hơdăh tơdrong tơm ‘măng năm tơmang ou pơm hơtŏk loi dơ̆ng tơgoăt tơgoăl joăt joe păng jang hơdoi lơ tơdrong ‘lơ̆ng hơ iă ƀar teh đak lơ̆m rim tơdrong, adoi tơgoăt kơjăp hloh dơ̆ng pơvei dih băl ƀar hơdrĕch hơdrung Việt Nam -Ba Lan. Pơma hơdăh tơdrong kăl kơ tơdrong jang hơdoi mơdro sa-tơmơ̆t jên jang lơ̆m tơgoăt tơgăl ƀar teh đak, Thủ tướng Teh đak Phạm Minh Chính hăm Kơdră chĕp pơgơ̆r Hạ viện Szymon Holownia drơ̆ng mĭnh nơ̆r atok kơtang jang hơdoi lơ̆m tơdrong jang tơm ou tơgăl hăm tơdrong tơgoăt tơgoăl chinh trĭ păng joh ayŏ ‘lơ̆ng liem ƀar teh đak păng drơ̆ng mĭnh nơ̆r hơdrin pơm hơtŏk mơdro sa iŏk đei kơ dih băl truh 5 ti USD.

Jei lơ̆m năr, Thủ tướng Phạm Minh Chính hlôi sơng pơma dơnuh hăm rim hơnih mơdro sa tơm Ba Lan ‘noh đei Grŭp jang Adamed hăm Hơnih jang gre păr LOT Airlines, pơtrŭt kơtang jang hơdoi mŭk drăm păng tơmơ̆t jên jang ƀar teh đak.

Hơdrol ‘noh, pơgê 17/1, (kiơ̆ jơ tơring) Thủ tướng Phạm Minh Chính năm ngôi păng đei ƀai pơma tơgŭm gĭt kăl tơ̆ Hnam trưng Đại học Tổng hợp Warsaw (Vác-xa-va), Ba Lan. Ƀai pơma hăm hơnăn: “Hơnhăk tơdrong pơvei Việt Nam – Ba Lan truh tŏk ‘lơ̆ng hloh, yua kơ tơdrong rơngei păng hơtŏk tơiung kơ 2 tơring Đông Nam Á păng Trung Đông Âu”. Hnam trưng Đại học Tổng hợp Vác-xa-va ‘noh jĭ tơƀôh ăn tơdrong jang hơdai kơjăp đơ̆ng Việt Nam păng Ba Lan lơ̆m tơdrong jang pơtho pơhrăm. Kơhrĕng sinh viên păng kang ƀô̆ Việt Nam hlôi păng tŏk bŏk kiơ̆ hŏk tơ̆ Hnam trưng. Lơ bơngai hrei ‘nâu jing dôm giáo sư, bơngai jang khoa hŏk hơget hloh lơ̆m lơ tơdrong jang.

Tơroi găh trĕng lăng găh tơdrong pơvei  Việt Nam – Ba Lan, Thủ tướng pơma hơdăh, Việt Nam tôch kơ lăng kăl păng ‘meh vă pơtrŭt, pơm ‘lơ̆ng hloh dơ̆ng tơdrong pơvei jang hơdai tôm tơdrong hăm dôm teh đak Trung Đông Âu, mă loi ‘noh jĭ hăm dôm teh đak buăl joăt đơ̆ng sơ̆ nhen Ba Lan. Thủ tướng tơroi găh 6 tơdrong ‘lơ̆ng vă hơnhăk tơdrong pơvei Việt Nam - Ba Lan tŏk ‘lơ̆ng ‘nao.