Tơ̆ pơma đam, ƀar Thủ tướng drơ̆ng mĭnh nơ̆r pơtrŭt kơtang tơlĕch jang kiơ̆ jơnei Nơ̆r tơchơ̆t atŭm Việt Nam - Trung Quốc găh hơnơ̆ng pơm kơtang hloh dơ̆ng tơgoăt tơgoăl Jang hơdoi tôm tong, tơ iung pơjing Tơpôl tơbăt dih băl hơnăp kơnh Việt Nam - Trung Quốc jĭ tơdrong jang tôch gĭt kăl kiơ̆ trong “6 hloh”; vei kơjăp ăn Khul kơdră kơpal păng rim kơdră anai tơƀơ̆p, pơma dơnuh dih băl, pơtrŭt kơtang năm ngôi dih băl, jang hơdoi lơ̆m khul Đảng, ƀar păh ƀar Khul kơdră chĕp pơgơ̆r Teh đak, Kuô̆k hô̆i/Nhân đại, Mặt trận Tổ quốc/Chính hiệp ƀar teh đak; pơ̆ih să jang hơdoi lơ̆m rim tơdrong jang kăl nhen tơbôl, vei lăng sơđơ̆ng teh đak, sơđơ̆ng tơring; atŏk kơtang jang hơdoi tơpă lơ̆m rim tơdrong păng pơgơ̆r tơƀơ̆p dih băl rim tơring păng rim khul kon pơlei; tơ iung pơjing trong sơlam teh đak tơ̆ groi teh rơngei hiôk hian, sơđơ̆ng, jang hơdoi păng atŏk tơ iung; vei lăng ‘lơ̆ng tơdrong ưh kơlăp dih băl, vei kơjăp rơngei keh kong, sơđơ̆ng tơ̆ đak dơsĭ; atok kơtang iung jang hơdoi lơ̆m rim ‘măng hop akŏm lơ̆m apŭng plĕnh teh, lơ̆m tơring.