Tơ̆ jơ pơma dơnuh, Thủ tướng teh đak Phạm Minh Chính hlôi tơbăt ăn Kơdră tơm Katalin Novak găh dôm tơdrong kăl mă ƀar păh hlôi iŏk đei lơ̆m ‘măng pơma đam kơ ƀar Thủ tướng, ‘noh dôm trong vă iung jang tih vă pơtrut kơtang tơgoăt tơgoăl joăt joe đơ̆ng sơ̆ păng jang hơdoi tôm tong ƀar păh Việt Nam hăm Hungary lơ̆m rim tơdrong.

Găh Chinh trĭ-jang tơbôl, Thủ tướng Phạm Minh Chính athei ƀar păh hơnơ̆ng atok kơtang tơƀơ̆p dih băl păng ăn khul kơdră kơpal, adoi nhen ƀar păh rim hơnih tơm, hơnih bơ̆ jang, tơring năm ngôi dih băl vă pơm hơtŏk loi dơ̆ng lui yom dih băl kơtang chinh trĭ păng hlôh vao dih băl, pơm hơyak pran ăn atŏk tơ iung păng pơih să jang hơdoi dih băl lơ̆m rim tơdrong. Găh jang hơdoi tơ̆ rim ‘măng hop akŏm apŭng plĕnh teh, Thủ tướng Teh đak Phạm Minh Chính hăm Kơdră tơm Katalin Novak drơ̆ng mĭnh nơ̆r hơnơ̆ng vei kơjăp tơƀơ̆p dih băl găh ‘ngoăih rim ‘măng hop akŏm lơ pang, iung jang hơdoi kơjăp, tơgŭm djru dih băl tơ̆ rim hơnih jang apŭng plĕnh teh, mă kăl ‘noh Liên hợp quốc, ASEM, trong jang ASEAN-EU vă vang tơgop ăn rơngei hiôk hoan, sơđơ̆ng, jang hơdoi păng atŏk tơ iung tơ̆ tơring păng lơ̆m apŭng plĕnh teh.