Thủ tướng Teh đak Phạm Minh Chính pơma hơdăh ‘măng năm tơmang Australia kơ Khul kơdră kơpal Việt Nam jĭ tôch got kăl, tơbăt hơdăh ‘meh vă atŭm hăm Australia hơmet pơ ‘lơ̆ng păng pơm kơtang hloh dơ̆ng tơgoăt tơgoăl jang hơdoi kơ ƀar teh đak, adoi nhen atŏk kơtang tơgoăt tơgoăl jang hơdoi kơjăp ƀar păh Kuô̆k hô̆i Việt Nam hăm Nghị viện Australia, tơgop pơ̆ih trong ăn jang hơdoi ‘nao lơ̆m khei năr kơnh.

Ƀar ‘nu kơdră chĕp pơgơ̆r drơ̆ng mĭnh nơ̆r tơgoăt kơjăp hloh dơ̆ng tơbôl kon pơlei, jang hơdoi tang găn tơplih tŏ ‘mi kial, pơih trong păr kơtă vă pơih să jang hơdoi pơtho pơhrăm, tơmang pơhiơ̆. Ƀlep lơ̆m jơ ‘năr au, Thủ tướng Teh đak Phạm Minh Chính ‘meh vă Nghị viện Australia hơnơ̆ng pơjing rơvơn ăn kon pơlei hơdrung Việt tơgop ăn atŏk tơ iung kơ Australia păng tơgoăt tơgoăl kơjăp ƀar teh đak.

 Jei lơ̆m ‘măng năm tơmang Australia, Thủ tướng Teh đak Phạm Minh Chính hlôi sơng pơma dơnuh hăm Kơdră chĕp pơgơ̆r Đảng Tự do Australia, ƀok Peter Dutton. Tơ̆ jơ tơƀơ̆p, ƀar ‘nu kơdră drơ̆ng mĭnh nơ̆r atŏk kơtang ăn khul năm ngôi dih băl păng kul kơdră tơƀơ̆p pơma dơnuh dih băl; pơtrŭt kơtang jang tơbôl khul Đảng păng kon pơlei năm ngôi dih băl, pơjing rơvơn ăn rim khul jang tơgoăt tơgoăl ƀar teh đak pơgơ̆r rim tơdrong joh ayŏ kơdŏ soang, đă ƀŏng lŏng tơplŏng kơdau, jang tơgŭm ‘mêm mơnat.