Găh trong jang tơm sơnăm hŏk 2023-2024 Thủ tướng athei rim hơnih tơm, hơnih bơ̆ jang, tơring hơnơ̆ng dăr lăng, hơmet ming, tơmơ̆t dơ̆ng tơtom trong tơchơ̆t, trong jang, pơm pơkeh dôm tơdrong tơchơ̆t rơvơn vă jang kiơ̆ tơplih ‘nao pơtho pơhrăm,  Pơprŏ dơ̆ng tơdrong jang pơtho pơhrăm đăi hŏk păng sư pham jăl jang 2021 - 2030, lăng truh 2050 păng hrôih tơbăt hơdăh Trong jang pơlong lĕch ‘măng khoă jăl pêng kiơ̆ trong pơtho pơhrăm chăl hle 2018.

Mă kăl Thủ tướng athei, Pơgơ̆r ‘lơ̆ng tơdrong hop akŏm pơtôch 10 sơnăm jang kiơ̆ Tơdrong tơchơ̆t 29 kơ TW găh tơplih ‘nao trong pơtho pơhrăm; Hơnơ̆ng chă tơchĕng hơlen, pơm pơkeh, atŏk tơ iung Tơdrong jang pơtho pơhrăm jăl hle 2018 trŏ lăp hăm trong tơlĕch jang ‘nao. ‘Ngoăih kơ ‘noh Thủ tướng pơjao ăn rim hơnih tơm, hơnih jang, tơring jang hơdoi hăm Hơnih tơm vei lăng pơtho pơhrăm đei trong jang tơgŭm ăn kon jên hu tơgŭm djru ƀok thây pơtho pơhrăm tơring hơtăih yăih; hơnơ̆ng tơmơ̆t jên răt kmăi kmŏk dăng tơlei internet tơ̆ rim tơring kon kông, tơring groi kông, tơring achon dơsĭ. Thủ tướng Teh đak Phạm Minh Chính hlôi athei rim đe kôn mon hŏk tro, sinh viên kăl hơdrin hloh dơ̆ng, hŏk pơhrăm; kơrŭn dĭ ai păng tơchăr lơ hloh dơ̆ng lơ̆m tơdrong pơtho păng hŏk pơhrăm.“Sơnăm hŏk ‘nao 2023-2024, Thủ tướng hmach chơt hơ iă ăn rim kang ƀô̆ vei lăng, rim ƀok thây kô ling lang kiơ̆ yok jơhngơ̆m đon ‘mêm kơ eng teh đak, bơ̆jang tơnăp hăm tơdrong jang kơdih, hơmet pơ ‘lơ̆ng tơnap tap, hơdrin iung jang kơ yuơ trong jang hle, tôm tong pơtho pơhrăm, trŏ lăp hăm tơdrong hơpơi ‘meh vă đơ̆ng Đảng, Teh đak păng Kon pơlei, tơgop tơgăl lơ̆m tơdrong atŏk tơ iung pran kơtang, gơ̆h hơgei, pơdrŏng hơnŭk hơnoa kơ Teh đak”.