‘Nou ‘măng năm tơmang blŭng a đơ̆ng Thủ tướng teh đak Việt Nam năm tơ̆ Ấn Độ jô̆ đơ̆ng ƀar teh đak pơjing tơgoăt Jang hơdoi gĭt kăl Tôm tong sơnăm 2016. Lăp lơ̆m ƀar năr, Thủ tướng Teh đak hlôi đei lơ tơdrong jang gĭt kăl, hăm dang 25 tơdrong pơgơ̆r, ‘noh rim ‘măng pơma đam, tơƀơ̆p pơma dơnuh hăm Kơdră kơpal Ấn Độ, rim Grŭp jang tih kơ Ấn Độ păng Jơnŭm rim tơdrong apŭng plĕnh teh kơ Ấn Độ.

Lơ̆m ‘măng năm tơmang, Kơdră chĕp pơgơ̆r ƀar teh đak hlôi sơkơ̆t hơdăh nơ̆r pơkăp atŏk kơtang hloh dơ̆ng tơgoăt tơgoăl Jang hơdoi gĭt kăl Tôm tong Việt Nam - Ấn Độ lơ̆m rim tơdrong jang joăt joe nhen vei lăng sơđơ̆ng teh đak-sơđơ̆ng dơ̆ng kơjăp, mơdro sa-tơmơ̆t jên jang, Joh ayŏ-pơtho pơhrăm păng pơih să rim tơdrong jang hơdoi ‘nao găh mŭk drăm rơgoh ‘lơ̆ng, mŭk drăm kơsô̆, mŭk drăm hơgei, atŏk kơtang mơdro sa păng tơmơ̆t jên jang ƀar păh, atŏk kơtang păng pơm kơtang hlŏh dơ̆ng jang hơdoi găh khoa hŏk-kmăi kmŏk.