Lơ̆m tam tôm 3 năr, Thủ tướng hlôi pơgơ̆r, vang akŏm dang 40 tơdrong jang, ‘noh đei dôm ‘măng hop akŏm kơ Hop akŏm tih G7 pơih să, dôm ‘măng tơƀơ̆p pơma dơnuh hăm Kơdră chĕp kơ̆l teh đak Nhật Bản, rim khŭl kơdră, anih mơdro sa, bôl buăl Nhật Bản păng dôm ‘măng pơma dơnuh, tơƀơ̆p hăm kơdră chĕp kơ̆l dôm teh đak păng dôm grŭp jang apŭng plĕnh teh. Hăm teh đak Nhật Bản, dôm ‘măng pơma đam, pơma dơnuh đơ̆ng Thủ tướng hăm Thủ tướng Nhật Ban, Kơdră chĕp kơ̆l dêh char Hiroshima păng lơ lap khŭl kơdră kơ teh đak Nhật Bản hlôi tơgop hơtŏk ‘lơ̆ng hloh dơ̆ng đon lui ngeh chĭnh trĭ, pơtrŭt pran kơtang pơvei jang hơdai jrŭ sơ̆ Việt Nam - Nhật Bản.

Thủ tướng Phạm Minh Chính kŭm hlôi đei dôm jĭt ‘măng tơƀơ̆p pơma dơnuh 2 pang kiơ̆ lơ̆m jơhngơ̆m đon rơ hau, tơpăt hăm đĭ đăng dôm kơdră chĕp kơ̆l G7, dôm teh đak đei hơvơn, dôm khŭl jang apŭng plĕnh teh vă pơma dơnuh dôm trong jang hơdăh, tơpă pơtrŭt tơdrong pơvei 2 pang păng hơtŏk loi dơ̆ng jang hơdai lơ̆m dôm tơdrong jang vang bơngơ̆t truh.