Thủ tướng Teh đak Phạm Minh Chính sơkơ̆t hơdăh, Việt Nam lăng kơjăp hơnăp jang kơ Liên hợp quốc lơ̆m pơtrŭt kơtang jang hơdoi lơ pang vă xek tơlang rim tơdrong lơ̆m plei teh.

Thủ tướng Teh đak tơbăt, Việt Nam tŏk bŏk tơ iung pơjing, atŏk tơ iung teh đak ‘moi kiơ̆ 3 tơdrong tơm ‘nŏh tơ iung pơjing Teh đak pháp quyền xã hội chủ nghĩa, trong jang dân chủ xã hội chủ nghĩa păng trong jang mŭk drăm mơdro sa lăng truh xã hội chủ nghĩa; atŏk kơtang 3 trong kăl găl tơdrong tơchơ̆t, khul jang păng trong hnam. Kơ iĕng Tổng Thư ký Liên hợp quốc hôn bơnê dôm tơdrong jơnei tôch gĭt kăl Việt Nam iŏk đei lơ̆m atŏk tơ iung mŭk drăm-tơpôl păng hơmet pơ ‘lơ̆ng đơ̆ng rŏng jĭ hơbuh Covid-19 kiơ̆ trong kơjăp ‘lơ̆ng. Găh dôm tơdrong lơ̆m apŭng plĕnh teh hrei au, ƀar păh tơbăt dih băl dôm tơdrong tơtăm găh đei ƀơm kơnê̆ đơ̆ng rim tơdrong long lơ̆m plei teh nhen rim ‘măng tơblăh vang, tơplih tŏ ‘mi kial, tŏk jur kơjă ưh sơđơ̆ng.