Tơ̆ jơ sơng pơma dơnuh, Ƀar păh chơt hơ iă tơ̆ hơnăp dôm hơyak atŏk tơ iung gĭt kăl lơ̆m tơgoăt tơgoăl jang hơdoi ƀar păh Việt Nam hăm Pơma dơnuh mŭk drăm apŭng plĕnh teh khei năr ou ki, mă kăl ‘noh tơdrong kĭ pơkăp Hla bơar ƀlŏk hơdơ̆r jang hơdoi jăl jang 2023-2026 lơ̆m sơnăm sơ̆ tơ̆ Hop akŏm Pơma dơnuh mŭk drăm apŭng plĕnh teh Thiên Tân.

Ƀar păh drơ̆ng mĭnh nơ̆r pơtrŭt kơtang tơlĕch jang kiơ̆ Hla bơar ƀlŏk hơdơ̆r jang hơdoi, jang hơdoi hăm Hơnih tơm jang gơ̆h hơgei kmăi kmŏk 4.0 tơ̆ pơlei tơm Hồ Chí Minh jing hơnih tơm tơgoăt jang hơdoi kăl hloh tơ̆ tơring. Ƀlep lơ̆m jơ ‘năr ou, Giáo sư Schwab hlôi ba kơthơ hơvơn Thủ tướng Teh đak Phạm Minh Chính vang năm Hop akŏm joăt joe Pơma dơnuh mŭk drăm apŭng plĕnh teh tơ̆ Davos sơnăm 2025.