Vă pơtrŭt kơtang tơgoăt tơgoăl jang hơdoi ƀar păh Việt Nam hăm OECD roi năr roi ‘lơ̆ng hơ iă, jơnei hloh, Thủ tướng tơbăt Việt Nam ‘meh vă chă hơlen vang mơ̆t lơ̆m OECD păng athei Ƀok Tổng Thư ký pơrô̆ athei rim Hơnih bơ̆ jang kơ OECD tơƀôh tơbăt ăn dôm trong jang ‘lơ̆ng păng tơgŭm Việt Nam atŏk kơtang kĕ pơjei, yak truh tơdrong trŏ lăp hăm tơdrong pơkăp ‘lơ̆ng vei lăng lơ̆m plei teh đơ̆ng OECD; tơgŭm Việt Nam pơm pơkeh păng tơbăt hơdăh rim hla bơar chih tơbăt bơ̆ jang mŭk drăm kăl vă pơm kơnăl ăn hơlen ‘lơ̆ng hơ iă ăn tơdrong pơchoh trong rim trong bơ̆ jang atŏk tơ iung đunh đai kơ Việt Nam. Thủ tướng athei OECD tơgŭm djru vă Việt Nam jang’lơ̆ng trŏ lăp hăm tơdrong pơkăp, trong tơlĕch jang, lăng truh vang mơ̆t hơdoi hlom hloh dơ̆ng lơ̆m tơdrong jang muk drăm apung plĕnh teh păng tơgop lơ hloh dơ̆ng ăn tơpôl apŭng plĕnh teh, kơ yuơ tơdrong rơngei hiôk hian, jang hơdoi, atŏk tơ iung lơ̆m apŭng plĕnh teh.