Tơ̆ jơ tơƀơ̆p, Thủ tướng Phạm Minh Chính păng phŏ Kơdră teh đak Harris tơƀôh jơhngơ̆m đon lăp găh dôm hơ yak hơtŏk tơiung pran kơtang đơ̆ng tơdrong pơvei jang hơdai tôm tơdrong Việt Nam – Mi, yak truh hơtŏk tơdrong pơvei tơ̆ hơnăp kơnh, mă loi ‘noh jĭ lơ̆m dôm tơdrong jang mŭk drăm - mơdro sa - tơmơ̆t jên jang, khoa hŏk - kơmăy kơmŏk, tơplih ‘nao pơcheh hơgei, pơtho pơhrăm, tơƀơ̆p băl đơ̆ng kon pơlei păng hơmet pơ ‘lơ̆ng hiong răm đơ̆ng tơblăh vang sơ̆.

Thủ tướng lăng ‘lơ̆ng dôm tơdrong vang tơgop đơ̆ng yă Kamala Harris ăn tơdrong pơvei 2 teh đak, mă loi ‘noh jĭ tơdrong tơgŭm kon pơlei Việt Nam vắc xin tang găn jĭ Covid-19 păng ‘meh vă tơƀơ̆p dơ̆ng yă tơ̆ hơnăp kơnh vă pơm hơdăh dôm tơdrong drơ̆ng nơ̆r gĭt kăl vă pơtrŭt tơdrong pơvei hơnơ̆ng yak mơ̆t jrŭ, đei yua, tơpă. Thủ tướng tơbăt Việt Nam tŏk bŏk jang hơdai hăm Mi vă hơmet ăn sơng Kơdră tơm teh đak Joe Biden mă ‘lơ̆ng lơ̆m ‘măng năm ngôi vă jê̆ truh.