Tơ̆ tơƀơ̆p, Thủ tướng Teh đak Phạm Minh Chính sơkơ̆t hơdăh, tơdrong joăt joe tơgoăt tơgoăl, tơgŭm djru dih băl ƀar teh đak Việt Nam- Campuchia ‘noh jing mŭk drăm kăp gĭt hloh, jĭ mĭnh lơ̆m dôm tơdrong kăl hăm tơdrong iung tơblăh pơm rơngei hơdrĕch hơdrung sơ̆ păng tơdrong jang tơ iung pơjing atŏk tơ iung kơ teh đak hrei ou. Ƀar Thủ tướng chơt hơ iă tơ̆ hơnăp dôm tơdrong atŏk tơ iung kơ tơgoăt tơgoăl teh đak tơjê̆ ‘lơ̆ng liĕm, jang hơdoi tôm tong, kơjăp ‘lơ̆ng đunh đai tai sơnăm ƀar teh đak khei năr ou ki, hôn bơnê kơtang tơdrong ƀar teh đak vei kơjăp rim ‘măng năm ngôi dih băl păng tơƀơ̆p dih băl khul kơdră kơpal, rim kơdră jang. Ƀar Thủ tướng pơma hơdăh tơdrong gĭt kăl chăl sơnăm tơgoăt tơgoăl Việt Nam - Campuchia - Lào; sơkơ̆t hơdăh hơnơ̆ng vei kơjăp trong iung jang hơdoi ƀar păh pêng teh đak tơ̆ rim khul, kơ yuơ đei iok yua kơ kon pơlei pêng teh đak, kơ yuơ rơngei hiôk hian, sơđơ̆ng păng atŏk tơ iung tơ̆ tơring păng lơ̆m apŭng plĕnh teh.

 Jei lơ̆m jơ ‘năr vang năm Hop akŏm, Thủ tướng Teh đak Phạm Minh Chính hlôi sơng pơma dơnuh hăm ƀok Lam Thiên Lập, Kơdră chĕp pơgơ̆r Tơring chĕp pơgơ̆r kơdih hơdrung Choang Quảng Tây, Trung Quốc, sơng pơma dơnuh hăm Kơdră chĕp pơgơ̆r Hơnih mong jên Atŏk tơ iung châu Á, tơƀơ̆p Thủ tướng Lào.