Lơ̆m jơ ‘năr chơt hơ iă, Thủ tướng Teh đak Phạm Minh Chính hôn bơnê kơtang hơnăp jang păng tơdrong tơgop đơ̆ng Tổng Thư ký păng Liên hợp quốc ăn tơdrong rơngei hiôk hian, sơđơ̆ng dơ̆ng kơjăp apŭng plĕnh teh, xek tơlang rim tơdrong kăl, adoi sơkơ̆t hơdăh Việt Nam tơgŭm djru păng drơ̆ng nơ̆r vang tơgop lơ̆m rim tơdrong hơdrin ‘noh.

Thủ tướng Teh đak tơgŭm djru dôm trong tơlĕch jang hơdrol hrei au đơ̆ng Tổng Thư ký, lơ̆m au đei tơdrong hơmet ăn Hop akŏm Joăt joe Đunh đai tai sơnăm tơchĕng hơlau pơgơ̆r lơ̆m sơnăm 2024. Thủ tướng tơbăt, Việt Nam tŏk bŏk hơdrin iung jang hơdoi hăm rim khul jang lơ̆m Liên hợp quốc tơlĕch lơ tơdrong jang hơdoi, mă kăl găh sơđơ̆ng ăn vei lăng sơđơ̆ng apŭng plĕnh teh, vang jang lơ̆m khul linh vei lăng rơngei hiôk hian Liên hợp quốc tơ̆ lơ tơring kăl, tơplih jang kiơ̆ rim Trong jang atŏk tơ iung kơjăp ‘lơ̆ng, tơplih yuh soh hơtŏ hơnơ̆ng, jang kiơ̆ hơtŏ hơnơ̆ng apŭng plĕnh teh, ưh kơ lê̆ bơngai bu hơchăng hŭt tơ̆ rŏng. Ƀlep lơ̆m jơ ‘năr au, Thủ tướng Teh đak Phạm Minh Chính hơvơn Tổng Thư ký António Guterres năm tơmang dơ̆ng teh đak Việt Nam.

Adoi tơ̆ New York, Thủ tướng t/đ bơ̆n Phạm Minh Chính hlôi sơng Kơdră jang tang măt ăn ƀok kơdră t/đ Hoa Kỳ gah hơyuh tŏ 'mi tơplih John Kerry pơđăp gah dôm trong jang vă tenh kuăng tơlĕch jang kiơ̆ dôm tơchơ̆t kăp gĭt kơ 'măng năm tơmang, mă kăl noh gah tơjră hăm hơyuh tŏ 'mi tơplih. Adoi lơ̆m năr  21/9 kiơ̆ jơ tơ̆ tơring, Thủ tướng Phạm Minh Chính hlôi pơma đam gah tơchơ̆t jang đei hơnăn: "Drŭt hơtŏk tơ-iung kơjăp sơđơ̆ng lơ̆m khei năr mŭk drăm kơpal teh đei lơ tơplih" hăm đe giáo sư, bơngai juăt jang gah mŭk drăm, bơngai jang hơlen hơgei truh đơ̆ng dôm hnam trưng đại học Harvard, Columbia, Yale. 'Nâu jing dôm anih pơtho pơhrăm păng hơlen gah tơchơ̆t jang juăt jue đunh đai mă đe ư ang tơ̆ Hoa Kỳ păng lơ̆m kơpal teh. Pơma pơtơm, Thủ tướng Phạm Minh Chính ră hơdah, Việt Nam hơnơ̆ng lăng tơgĭt tơdrong pơma đam gah tơchơ̆t jang mŭk drăm, hơtŏk tơ-iung hăm dôm anih jang hơlen gơh hơgei hloh lơ̆m kơpal teh.