Pơma tơ̆ hop akŏm, Thủ tướng Phạm Minh Chính pơma hơdăh, tơplih kơ sô̆ ‘noh jĭ tơdrong kăl, tŏk bŏk đei ƀôh tôch kơ pran kơtang, jrŭ să lơ̆m apŭng plĕnh teh. Lơ hla ar kăl păng tơdrong tơchơ̆t đơ̆ng Đảng hlôi tơroi ‘lơ̆ng găh tơplih kơ sô̆, mŭk drăm kơ sô̆, tơpôl kơ sô̆ lơ̆m dôm tơdrong tơm, tơdrong jang hơtŏk tơiung păng ‘lơ̆ng gĭt kăl; băt hơdăh tơplih kơ sô̆ ‘noh jĭ 1 lơ̆m dôm hơnăp jang tơm.

Sơnăm 2023 jĭ sơnăm Chih răk kơ sô̆ teh đak, hăm tơdrong jang chih răk kơ sô̆ ‘noh jĭ tơmam drăm teh đak, jĭ tơdrong ‘lơ̆ng kơ hơtŏk tơiung, bơ̆n kăl kơ băt, tơgĕch iŏk yua tơdrong hiôk vă iŏk jang, hơtŏk kơjă kăp gĭt đơ̆ng hla ar chih răk kơ sô̆ jing tơdrong gĭt kăl pơyua ăn hơtŏk tơiung mŭk drăm - tơpôl. Thủ tướng athei dôm anih tơm, anih jang, tơring kăl kơ akŏm chih pơ keh trong jang tơgŭm ăn tơdrong jang kơ sô̆, tơdrong tơm kơ sô̆ păng bơngai jang kơ sô̆ vă pơ trŭt hla ar chih răk kơ sô̆ hơtŏk tơiung sơđơ̆ng, kơjăp.