Khei ‘năr âu ki, Đảng, teh đak, Khŭl kơdră teh đak hlôi ‘măn jên jang lơ vă hơtŏk tơiung trong nơnăm, klăih song tơmơ̆t jên jang đei tơdrong tơm tơ̆ dôm tơring. Pơma tơ̆ jơ pơm lêh, Thủ tướng Phạm Minh Chính tơƀôh rơđăh, Tơdrong jang pơm trong gre kơ dâu hrĕnh Tuyên Quang - Hà Giang kơ jung 105 km, đei akŏm kơ sô̆ tơmơ̆t jên jang 10 rơbâu ti hlak jên đei Khŭl kơdră teh đak klăih song ăn 2 dêh char Tuyên Quang păng Hà Giang pơm anih jang tơ ‘ngla vei lăng, bơ̆jang kiơ̆ trong jang tơmơ̆t jên jang teh đak lơ̆m Tơdrong jang tơ iung ming păng hơtŏk tơiung mŭk drăm tơpôl.

‘Nâu kŭm jing tơdrong pơm hơdăh tơdrong tơchơ̆t đơ̆ng Anih tơm Chĭnh trĭ găh trong vă jang hơtŏk tơiung mŭk drăm - tơpôl, vei sơđơ̆ng teh đak, sơđơ̆ng Tơring tŏk bŏk păng tơring groi kông Bắc Bộ truh sơnăm 2030, trĕng lăng truh sơnăm 2045. Thủ tướng athei, đơ̆ng rŏng kơ lêh tơlĕch jang, athei dôm anih jang akŏm đĭ jơhngơ̆m, pơjei băl jang đang ‘lơ̆ng dôm hơnăp jang hlôi tơlĕch ăn.