Kơsơ̆ năr 12/7, Thủ tướng Teh đak Phạm Minh Chính, Kơdră chĕp pơgơ̆r Hơnih bơ̆ jang Teh đak găh tơplih kơsô̆ pơm tơm ‘Măng hop akŏm mă 6 kơ Hơnih bơ̆ jang păng Hop akŏm pơtôch 6 khei blŭng sơnăm păng tơlĕch tơdrong jang 6 khei hơtuch sơnăm 2023 găh tơplih kơsô̆ teh đak păng Tơdrong vă jang atŏk tơ iung jang kiơ̆ chih răk găh măt kon pơlei oei, hơnăn păng sơkơ̆t hơdăh điên tư tơgŭm ăn tơplih kơsô̆ teh đak jăl jang 2022 - 2025, lăng truh sơnăm 2030 (Tơdrong vă jang 06) kơ Khul kơdră Teh đak.

Lơ̆m khei năr kơnh Thủ tướng athei, tơplih kơsô̆ teh đak kăl tơlĕch jang mă hơdăh, tôm tong mă lei kăl tơlĕch jang mă ‘lơ̆ng; iung jang hơdrol rim tơdrong kăl hloh ‘noh rim hơnih chih răk teh đak; sơđơ̆ng mạng kơtang, sơđơ̆ng kơtơ̆ng ang. Thủ tướng Teh đak sơkơ̆t hơdăh, tơ iung pơjing, atŏk tơ iung pơjing công dân số ‘noh jing tơdrong kăl kơ tơdrong jang tơplih kơsô̆ teh đak, mĭnh lơ̆m dôm tơdrong ưh kơ gơ̆h tơplih lơ̆m hơrih sa mŭk drăm, tơpôl. Thủ tướng tơƀôh hơdăh, kăl sơđơ̆ng ‘lơ̆ng ăn tơdrong đei iŏk yua pơđĭ Teh đak, kon pơlei; mă lei kăl tơlĕch jang kiơ̆ mă trŏ ƀlep, lăp hăm jơhngơm đon kon pơlei vă kon pơlei păng hơnih mơdro sa tơgŭm, vang iung jang kiơ̆ kơtang.