Tơ̆ jơ sơng, Thủ tướng Phạm Minh Chính hlôi gơih nơ̆r bơnê truh Khŭl kơdră teh đak păng kon pơlei Ấn Độ găh dôm tơdrong tơƀôh jơhngơ̆m đon ‘mêm mơnat ‘măn kơ Tổng Bí thư Nguyễn Phú Trọng; ăn kuan tih gĭt kăl năm hơpong păng Quốc hội Ấn Độ hlôi ‘măn jơ năr ƀlŏk hơdơ̆r kơ Tổng Bí thư lơ̆m ‘năr 22/7 âu ki. Tơdrong ‘nâu tơƀôh tơdrong ‘mêm đơ̆ng bơngai buăl joăt, kŭm nhen tơdrong joăt joe kăp gĭt đơ̆ng 2 hơdrĕch hơdrŭng Việt Nam păng Ấn Độ.

Thủ tướng Phạm Minh Chính athei 2 teh đak hơnơ̆ng jang hơdai hơnhăk tơdrong pơvei Jang hơdai Gĭt kăl Tôm tơdrong Việt Nam - Ấn Độ hơtŏk tơiung pran kơtang hloh dơ̆ng păng pơma hơdăh, jang hơdai lơ̆m tơdrong jang khoa hŏk păng kơmăy kơmŏk, kơtơ̆ng ang - viễn thông, kơmăy kơmŏk kơsô̆ ‘noh jĭ dôm tơdrong jang tôch kơ ‘lơ̆ng, kăl kơ đei bơngơ̆t truh hơtŏk hloh dơ̆ng.