Tơ̆ jơ sơng, 2 păh akhan, tơdrong pơvei Việt Nam - Hàn Quốc oei mât lơ̆m khei ‘năr ‘lơ̆ng hơiă hlŏh, đon lui găh chinh trĭ hơnơ̆ng đei hơmet kơjăp; tơdrong jang hơdoi lơ̆m rim tơdrong tŏk ‘lơ̆ng. 2 păh oei đei lơ tơdrong ‘lơ̆ng vă jang hơdoi, mă loi đơ̆ng rŏng kơ pơm hơtŏk tơdrong pơvei jing “Jang hơdoi gĭt kăl tôm tơdrong” ƀlep ƀât tơbăt 30 sơnăm pơjing tơdrong pơvei jang tơbôl lơ̆m khei 12/2022. 

Thủ tướng pơma hơdăh, mŭk drăm 2 teh đak đei lơ tơdrong ‘lơ̆ng vă jang hơdoi, tơgŭm băl, mă loi găh tơdrong jang tŏk rơgŏh yoa tơdrong tơm ‘nŏh tơjur ƀiơ̆ kơchơ̆t pơm ăn plei teh roi tŏ, mă loi ‘nŏh jĭ kĭ ăn Tơdrong drơ̆ng nơ̆r jang hơdoi găh tŏ ‘mi kial lơ̆m khei 5/2021 sơ̆.