Tơ̆ Hnam hôp tĕh đak tơ̆ Hà Nội, Thủ tướng Phạm Minh Chính pơgơ̆r hop akŏm atŭm rim sơnăm găh kơmăy kơmŏk 4.0 sơnăm 2023 hơdai hăm tơlĕch tơdrong tơchơ̆t kơsô̆ 29 găh kơmăy kơmŏk chăl ‘nao hăm hơnăn “tưk tơiung tơdrong tơplih hăm kơmăy sô̆, jang tŏk rơgŏh, tơjur ƀiơ̆ khei ‘năr jang tŏk hăm kơmăy kơ mŏk ‘nao kơ tĕh đak klep truh sơnăm 2030, trong jang truh sơnăm 2045”.

Pơma tơ̆ hop akŏm, Thủ tướng Phạm Minh Chính pơma hơdăh, jang kiơ̆ păng jang tŏk pran đơ̆ng rim tĕh đak lơ̆m chăl jang hăm kơmăy sô̆ păng jang hơdoi jơ̆p plei tĕh hrei ‘nâu ‘nŏh jĭ tơdrong tih hai, gĭt kăl hai păng athei jang đunh đai hai. Hăm Việt Nam, băt hơdăh tơdrong ‘lơ̆ng păng nơ̆r athei jang, Khul kơdră tĕh đak kơchăng jang kiơ̆, tơplih ‘nao vă jang tŏk.

Adrol kơ ‘nŏh, hơnơ̆ng adrin vă pơjing Khul kơdră tĕh đak gơ̆h hơgei kĕ vei lăng jang tŏk lơ̆m chăl jang hăm kơmăy sô̆. Atŭm hăm ‘nŏh, rim tơring, anih jang păng đĭ đăng tơpôl đei lơ tơdrong tơplih đơ̆ng đon hlôh vao truh tơdrong bơ̆ jang vă tơgĕch iŏk tơdrong ‘lơ̆ng păng jang kiơ̆ tơdrong nol lơ̆m chăl jang hăm kơmăy sô̆.