Pơma tơ̆ Hop akŏm Thủ tướng pơma hơdăh, Kŏng an so kon pơlei ‘noh jĭ dôm bơngai hlôi yak hloh iung tơblăh, pơhrăm păng jang đei kiơ̆ ‘nhui ŭnh đơ̆ng dôm ‘măng tơblăh vang, yak hloh ‘măng iung tơblăh vei lăng sơđơ̆ng Teh đak, hlôi đei plang jơhngơ̆m tih tên ăn tơdrong jang iung tơblăh iŏk rơngei hơdrĕch hơdrŭng, pơjing păng vei lăng teh đak; păng hrei ‘nâu tŏk bŏk jing 1 khŭl linh tôch kơ gĭt kăl đơ̆ng tơpôl.

Thủ tướng pơma hơdăh, Đảng, Teh đak ling lang lăng kăl păng lăng ‘lơ̆ng dôm tơdrong vang tơgop gĭt kăl đơ̆ng khŭl kŏng an so lơ̆m tơdrong jang pơjing păng vei lăng Teh đak; hlôi đei lơ trong jang hơvơn jơhngơ̆m pran đơ̆ng khŭl kŏng an so kon pơlei lơ̆m tơdrong jang pơjing teh đak păng mă loi ‘noh jĭ trong jang tơgŭm hăm kang ƀô̆ Kŏng an pơdơh hưu; hlôi chĕp kơ̆l, pơgơ̆r Anih jang Đảng kŏng an Trung ương,  Anih tơm vei lăng kŏng an pơm tơdrong hiôk pơjing, hơmet tôm Kâu lak ƀô̆, Anih pơma dơnuh kŏng an pơdơh hưu rim tơring đơ̆ng Trung ương truh tơring.