Tơroi tơbăt hăm Thủ tướng Phạm Minh Chính păng khŭl bơ̆jang ƀơ̆t năm ngôi, hơlen lăng tơ̆ Anih gre treng dơ̆ng Hà Nội, Kơdră dơnơm vei lăng Kŏng ti tơm Trong gre treng Việt Nam Hoàng Gia Khánh tơbăt, sơnăm 2023, anih jang trong gre treng Việt Nam pơma atŭm păng Kŏng ti tơm Trong gre treng pơma hơdrô̆ hlôi yak hloh lơ mơmat tat, tơhlăk tơhlĭn, iŏk đei 1,2 jơnei tôch kơ gĭt kăl. Iŏk yua akŏm lơ̆m Kŏng ti tơm iŏk đei 101,7% trong tơlĕch jang, iŏk yua đơ̆ng rŏng kơ thuê̆ đei 115% trong tơlĕch jang, vei sơđơ̆ng trong gre treng pơđĭ 03 tơdrong hơgăt. 

Thủ tướng Phạm Minh Chính kiơ̆ đơ̆ng hơlen lăng yan âu tơ̆ Anih gre treng dơ̆ng Hà Nội, chơt hơiă ƀơ̆t tơmoi hơlen lăng anih jang trong gre treng Việt Nam hlôi hơmet ming ‘lơ̆ng pơvih pơvăn, tơtă kơ Kŏng ti tơm ưh kơ gơh pơm pơ hơi, kăl đĭ jơhngơ̆m hloh dơ̆ng, gô đei jơnei ‘lơ̆ng hloh. Găh trong vă jang hơtŏk tơiung gre treng kơdâu tơ̆ trong gre treng Việt Nam, lăng kăl pơjing  tơdrong hơtŏk tơiung kơmăy kơmŏk trong gre treng kiơ̆ trong ‘nao; tơtĕnh tơlĕch jang đei yua Tơdrong jang kăl hơtŏk tơiung, Tơlĕch trong jang pơm tơlĕch tĕch mơdro păng tơmơ̆t jên jang hơtŏk tơiung jăl jang 2021-2025 hlôi đei kĭ ăn.