Hop akŏm sơng đei tơdrong vang akŏm đơ̆ng hloh 1.000 ‘nu bơngai tang măt ‘noh jĭ dôm bơngai chĕp kơ̆l, bơngai joăt jang kơmăy kơmŏk gơh hơgei truh đơ̆ng lơ grŭp jang tih lơ̆m apŭng plĕnh teh, kŭm hăm lơ bơngai mơdro sa truh đơ̆ng dôm teh đak Mi, Trung Quốc, Hàn Quốc, Nhật Bản, Ấn Độ, Phalăng, Đức, Hà Lan… păng Việt Nam vă pơma dơnuh dôm trong vă jang hơtŏk tơiung, tơdrong hiôk păng long nol đơ̆ng anih jang kơmăy kơmŏk bán dẫn păng tơdrong gơh hơgei (AI) jơ̆p plei teh, tơlĕch trong jang hơtŏk tơiung rim tơdrong jang kơmăy kơmŏk âu ăn kơ Việt Nam.

‘Moi kiơ̆ Hop akŏm âu, Việt Nam yak truh anih dơ̆ng ‘nao lơ̆m apŭng plĕnh teh, pơih ăn dôm tơdrong hiôk jang hơdai gĭt kăl, pơm đei tơdrong kơjăp ăn tơdrong jang tơplih kơsô̆, băt hơdăh păng pơm tơ ‘ngla kơmăy kơmăy, bơ̆jang kiơ̆ tơdrong tơm hơtŏk tơiung hrĕnh păng kơjăp lơ̆m jăl jang truh. ‘Nâu jĭ hơyak năm gĭt kăl vă dôm bơngai jang khoa hŏk, bôl buăl apŭng plĕnh teh vang jang hơdai hăm dôm bôl buăl jang hơdai kơ Việt Nam pơm đei chăl ‘nao ăn mŭk drăm kơsô̆ kơ Việt Nam.