Tơ̆ Hop akŏm kơmăy kơmŏk hơgei Việt Nam – Hà Lan, dôm bơngai tang măt pơma dơnuh lơ tơdrong ƀơm truh dôm tơdrong jang: Việt Nam yak tŏk anih dơ̆ng kơ jung hloh lơ̆m trong jang kơjăp kăp gĭt kơmăy kơmŏk hơgei: trong lăng đơ̆ng dôm anih mơdro sa jơ̆p plei teh; Hơtŏk tơiung păng rong vei tơdrong hơgei kơmăy kơmŏk ‘nao Việt Nam: tơdrong jang păng nơ̆r apĭnh... Pơma tơ̆ âu, Thủ tướng Hà Lan Mark Rutte tơbăt lơ̆m ‘măng năm ngôi tơ̆ Việt Nam đơ̆ng ƀok ‘măng âu đei khŭl vă jê̆ 30 anih mơdro sa kơmăy kơmŏk hơgei tih hloh Hà Lan kiơ̆ năm, lơ kŏng ti kơmăy kơmŏk hơgei kơ Hà Lan pơtơm đei dôm tơdrong jang tơmơ̆t jên jang, lơ anih mơdro sa nai tŏk bŏk chă hơlen lăng păng gô tơmơ̆t jên jang, jang hơdai tơ̆  Việt Nam.

Pơma tơ̆ Hop akŏm mŭk drăm rơgoh, Thủ tướng Phạm Minh Chính akhan, hơtŏk tơiung mŭk drăm rơgoh păng kơjăp ‘noh jĭ tơ khoă păng jing trong năm pơgŏ đơ̆ng dôm teh đak lơ̆m jơ̆p plei teh. Thủ tướng lăng ‘lơ̆ng hơnăp jang iung jang hơdrol đơ̆ng Jơnŭm châu Âu (EU) lơ̆m pơtrŭt pơjing 1 mŭk drăm jơ̆p plei teh rơgoh păng ‘lơ̆ng. Thủ tướng athei dôm Anih tơm, anih jang, tơring păng tơpôl bơngai mơdro sa Việt Nam păng EU kăl kơ tŭn pran păng pơm hơdăh ‘lơ̆ng dôm nơ̆r pơkăp jang hơdai hlôi đei đơ̆ng Việt Nam păng EU; pơkăp gô ling lang vei lăng tơdrong pơm tơm păng đei yua trŏ ƀlep đơ̆ng bơngai tơmơ̆t jên jang teh đak đe lơ̆m dôm tơdrong jang hơyơ; ling lang vang yak hơdai hăm dôm anih mơdro sa yak hloh long nol, mơmat tat. Tơgĕch iŏk tơdrong hiôk, ‘lơ̆ng vă dôm tơdrong jang sơđơ̆ng, đunh đai tơ̆ Việt Nam kiơ̆ lơ̆m jơhngơ̆m đon “đei yua hơdai, ưh kơ pŭn ai vang tơgŭm băl”.