Ăh 'măng xơng, Thủ tướng Phạm Minh Chính ăn tơbăt Việt Nam tơchơ̆t trong jang tơbôl hiôk hian, rơngei, jang hadoi păng hơtŏk tơ-iung, jang lơ tơdrong, lơ păh; pơjing mŭk drăm rơngei hiôk hian, tơguăt hăm hơbĕch hơbal vang jang hadoi lơ̆m apŭng plenh teh tơpă đei jơnei. Kơdră jang tang măt ăn teh đak Bỉ tơ̆ Việt Nam ƀok Karl Van Den Bossche xơkơ̆t hơdăh Bỉ hơpơi 'meh hơtŏk jang hadoi hăm Việt Nam lơ̆m dôm tơdrong jang, mă hăt noh lơ̆m khei năr ƀar teh đak tŏk bŏk oei tơbăt 50 xơnăm iung jang tơbôl, hmach bơnê kơ tơdrong mă Jơnŭm pơgơ̆r teh đak Việt Nam hlôi tơlĕch Tơchơ̆t unh hơyuh 8, 'nâu jing anih dơnơm kăp gĭt vă rim anih jang mŭk drăm tơlĕch dôm tơdrong jang găh unh hơyuh. Thủ tướng hơpơi 'meh, Kơdră jang tang măt Karl Van Den Bossche pơtoi chă hơvơn rim anih jang mŭk drăm kơ teh đak Bỉ axong pơm jang tơ̆ Việt Nam, mă kăl noh lơ̆m dôm tơdrong jang 'nao hơtŏk tơ-iung nhen tơplih kơsô̆, tơplih 'nao gơh rơgei, tơplih jang jơk.