Thượng tướng Nguyễn Tân Cương pơma hơdăh, jang hơdai khŭl lĭnh đơ̆ng 2 teh đak khei ‘năr âu ki hơnơ̆ng hơtŏk tơiung ‘lơ̆ng, đei yua, tơƀôh hơdăh tơ̆ dôm tơdrong jang nhen: Tơlĕch jang jrŭ să Tơdrong tơchơ̆t kơthơ păng Trong tơlĕch jang hơdai rim sơnăm đơ̆ng 2 Anih tơm vei lăng Khŭl lĭnh; tơroi tơdrong hlôh vao atŭm găh dôm tơdrong gĭt kăl, pơtho pơhrăm bơngai jang; jang hơdai vei lăng tơring sơlam; tơgŭm kon pơlei tơring sơlam hơtŏk tơiung mŭk drăm - tơpôl; jang hơdai, tơgŭm băl tơ̆ dôm hop akŏm, trong jang tơgŭm lơ pang.

Thượng tướng Nguyễn Tân Cương athei tơ̆ hơnăp kơnh, 2 păh kăl kơ akŏm lơ̆m dôm tơdrong jang nhen: Jang hơdai tơgŭm păng tơlĕch jang đei yua hlôh vao atŭm đơ̆ng kơdră chĕp kơ̆l kơpal păng Anih tơm vei lăng Khŭl lĭnh 2 teh đak găh jang hơdai khŭl lĭnh; pơma dơnuh khŭl, tơƀơ̆p sĩ quan mơ lôh; pơtho pơhrăm bơngai jang; jang hơdai vei lăng tơring sơlam; tơroi tơbăt, pơtho pơhrăm găh tơdrong joăt pơvei 2 teh đak, 2 khŭl lĭnh.