Kiơ̆ tơdrong tơchơ̆t, Thượng tướng Trần Quốc Tỏ, Bơngai jang lơ̆m Trung ương Đảng, Phŏ Bí thư anih jang Đảng Kŏng an Trung ương, Phŏ kơdră Anih tơm vei lăng Kŏng an vei lăng tơdrong jang kơ Anih tơm vei lăng Kŏng an ding truh ƀơ̆t kơdră gơh kĭ ăn tôm kơchư̆k jang Kơdră Anih tơm vei lăng Kŏng an kiơ̆ tơdrong Tơchơ̆t kơpal đei tơmơ̆t yua jô̆ đơ̆ng năr kĭ (22/5/2024). Ƀok Trần Quốc Tỏ rơneh ‘năr 28/1/1962, pơlei tơ̆ xăh Quang Thiện, apŭng Kim Sơn, dêh char Ninh Bình. Tơdrong gơh hơgei Phŏ Giáo sư, hŏk Tiến sĩ Luật học, hŏk găh hơlen lăng tơdrong pơm glăi, Dăr hơlen pơm glăi; Cao cấp lý luận chính trị.

Ƀok Trần Quốc Tỏ jĭ Bơngai jang lơ̆m Trung ương Đảng jăl XII, XIII; Bơngai tang măt Quốc hội jăl XIV, XV. Đơ̆ng khei 3/2014, ƀok Trần Quốc Tỏ jĭ Phŏ Bí thư Anih jang Đảng dêh char đang kơ ‘noh Phŏ Bí thư Chĕp kơ̆l pơgơ̆r Anih jang Đảng dêh char Thái Nguyên. Truh khei 10/2015, ƀok pơm kơdră jang lơ̆m Anih chĕp kơ̆l pơgơ̆r Trung ương Đảng jăl XII; Bí thư Anih jang Đảng dêh char Thái Nguyên jăl jang 2015 - 2020; Kơdră Khŭl tang măt Quốc hội dêh char Thái Nguyên; Bơngai jang lơ̆m Anih jang Khŭl lĭnh păng sơđơ̆ng Quốc hội jăl XIV. Khei 5/2020, ƀok Trần Quốc Tỏ pơm Phŏ kơdră Anih tơm vei lăng Kŏng an klĕp truh dang ei.