Pơjao Tơchơ̆t păng iung pơma tơ̆ pơm lêh, Kơdră chĕp pơgơ̆r Teh đak pơma hơdăh, Tơchơ̆t pôk tơmơ̆t au ‘noh jĭ tơdrong chơt hơ iă tih tên hloh hăm ƀok Trịnh Văn Quyết, jĭ tơdrong hiôk chơt atŭm kơ Khul Đảng Ƀô̆ đô̆i Trung ương, Hơnih tơm Ƀô̆ đô̆i vei lăng sơlam teh đak, Hơnih tơm Chinh trĭ Khul Ƀô̆ đô̆i kon pơlei Việt Nam păng khul ƀô̆ đô̆i kon pơlei; adoi tơƀôh hơdăh jơhngơ̆m đon lui yom, lăng ba đơ̆ng Đảng, Teh đak păng kon pơlei hăm Khul Ƀô̆ đô̆i păng Khul ƀô̆ đô̆i kon pơlei; tơdrong hôn bơnê kơtang hăm dôm tơdrong tơgop đơ̆ng ƀok Trịnh Văn Quyết hăm bơ̆ jang đảng, bơ̆ jang chinh trĭ lơ̆m Khul ƀô̆ đô̆i dôm sơnăm au ki. Iung pơma tơ̆ pơm lêh, Thượng tướng Trịnh Văn Quyết pơkăp hơnơ̆ng hơdrin đĭ ai, vei kơjăp jơhngơ̆m đon ‘lơ̆ng kĕch mang, tơdrong lui yom, tơdrong jang ‘lơ̆ng kơ bơngai kang ƀô̆, đảng viên; hơdrin hŏk pơhrăm păng pơm kiơ̆ jơhngơ̆m đon ‘lơ̆ng trong jang gơ̆h hơgei kơ Ƀok Hô, dôm tơdrong pơkăp jơhngơ̆m đon ‘lơ̆ng kĕch mang kơ kang ƀô̆, đảng viên lơ̆m chăl ‘nao; ling lang iŏk păng iung jang keh đang dôm tơdrong jang đei Đảng, Teh đak, Khul Ƀô̆ đô̆i păng Kon pơlei pơjao ăn.