Tơ̆ jơ bơ̆ jang găm Hơnih vei lăng kon pơlei dêh char Dak Nông năr 8/4, Grŭp jang Kmăi kmŏk tơmo ngar-Mŭk drăm lơ̆m teh Việt Nam (TKV) hlôi đŏk tơbăt Trong pơprŏ iung jang tơchă, sir iŏk, pơm tơlĕch păng iŏk yua mŭk drăm lơ̆m teh jăl jang 2021-2030 păng tơdrong tơlĕch jang rim tơdrong vă jang Bauxite kơ TKV lơ̆m dêh char.

Kiơ̆ kơ ‘noh, TKV hlôi ‘măn 1.000 ti hlak jên vă tơchă rim hơnih đei bauxit lơ̆m dêh char Dak Nông, hơmnet ăn tơmam drăm vă trŏ lăp sơđơ̆ng ăn tơlĕch jang rim tơdrong vă jang Bauxit-Nhôm tơ̆ dêh char au. TKV lui kơjăp găh tơdrong kĕ jang kơ rim tơdrong vă jang au păng pơkăp gô tơlĕch jang lơ̆m khei ‘năr hrôih hloh. Tơ̆ jơ bơ̆ jang, Kơdră chĕp pơgơ̆r Grŭp jang Kmăi kmŏk Ngar tơmo-Mŭk drăm lơ̆m teh Việt Nam (TKV) hlôi tơbăt hơdăh dôm tơdrong tơnap tap, tơhlăk tơhlĭn lơ̆m tơlĕch jang kiơ̆ Tơdrong vă jang khei năr au ki, hăm dôm tơdrong jang vă tơlĕch jang lơ̆m khei năr kơnh păng tơlĕch ăn, apĭnh mĭnh ƀar tơdrong ƀơm truh bơ̆ jang năm tơchă, sir iŏk, pơm tơlĕch păng iŏk yua Bô xít, Alunmin, Nhôm.