Kiơ̆ Anih tơm Choh jang xa păng Hơtŏk tơring tơrang, sơnăm 2023 păng 4 khei blŭng sơnăm 2024, kơyuơ tŏ kơtang, jư̆p teh đak đei ƀôh jê̆ 400 ‘măng unh xa bri, pơrăm jê̆ 1.200ha bri, păng pơrăm tih tên gah mŭk drăm, pơm kơnê̆ tê̆ truh cham char. Mă hăt noh, unh xa bri hlôi pơm 12 ‘nu bơngai lôch, 6 ‘nu rơka. Jơ̆p teh đak đei pơhlom 4.000 ‘măng phă bri, pơrăm hloh 1.200ha. Dôm tơdrong phă bri đei ƀôh mă tơm noh tơ̆ dôm dêh char Tây Nguyên, tơring groi kông gah Tu păng Tu Tŏk bŏk.

Ƀok Nguyễn Hữu Tháp, Phŏ Kơdră Anih jang vei lăng kon pơlei dêh char Kon Tum ăn tơbăt, jĭ dêh char đei hơgăt bri să hloh lơ̆m tơring Tây Nguyên hăm hloh 552.000ha, tơdrong jang vei lăng bri, tang găn păng pĭt unh xa bri tơ̆ tơring ƀơm lơ tơnap tap. Trong tơchơ̆t jang, jên asong jang ăn dôm tơdrong jang gah bri păng bơngai jang gah bri tam mă đei sơđơ̆ng. Atŭm hăm lơ tơring, dêh char Kon Tum tŏk bŏk oei tơrĕk truh tơdrong chư̆ng chi sơkơ̆t carbon, kăl đei pơtho vă pơm kiơ̆: “Chư̆ng chi sơkơ̆t carbon bri jing minh tơdrong ‘nao păng âu đei lăng jĭ minh anih pơkăp jên hu kơjăp sơđơ̆ng vă tơgŭm kăp gĭt ăn tơring păng dôm tơ-‘ngla bri pơm kiơ̆ dôm sơnong jang vei lăng bri, tang găn păng pĭt unh xa bri. Mă lei, tơdrong au tam mă đei pơtho hơdah vă pơm kiơ̆. Pơkăl Jơnŭm pơgơ̆r teh đak, rim anih jang tơm Trung ương hơlen chih akŏm tơbang pơtho hơdah vă pơm kiơ̆, mă kăl noh gah pơkăp tĕch – răt, vei lăng păng iŏk yua jên jang âu”

Pơma pơgơ̆r Hop akŏm, Phŏ thủ tướng Trần Lưu Quang tơbăt, gah chih akŏm, bri kơ jơ̆p teh đak noh 42% mă lei tơpă noh kơđeh hloh kơsô̆ đei chih. Kiơ̆ tơchơ̆t oei yua dang ei, truh sơnăm 2030, pơtơm pơkă hơlơ̆k dơ̆ng, mă lei Trung ương hlôi tơchơ̆t pơjao ăn Anih tơm Choh jang xa păng Hơtŏk tơring tơrang sơkơ̆t chă pơkă hơdrô̆ ăn 5 dêh char Tây Nguyên. ‘Nâu noh vă jang hơdrol tơ̆ minh tơring, vă hơlen lăng bri oei đei nhen lơ̆m hla bar chih dah mă ưh.

Phŏ thủ tướng Trần Lưu Quang adoi tơrĕk, sơnăm âu tŏ ‘mi kial tơplih pơm ăn tŏ pơđang kơtang hloh. Mă khei năr âu hlôi đei ‘mi tơ̆ lơ tơring, bri pă gan hli ƀơm unh xa mă lei tam mă gơh pơma hơdrol kơlih đak ‘mi tam mă lơ, lơ̆m kơplah chih tơroi đơ̆ng Anih jang hơlen tŏ ‘mi kial hơbŏ tŏ phang oei pơdui đunh năr dơ̆ng. Phŏ thủ tướng adoi ră hơdah, athei hơtŏk iŏk yua trong jang ‘nao vă vei lăng păng tang găn unh xa bri. Kiơ̆ đơ̆ng chă hơlen tơpă tơ̆ Pơgar tơm Chư Mom Rây, apŭng Sa Thầy, dêh char Kon Tum, Phŏ thủ tướng Trần Lưu Quang chih sơkơ̆t dôm tơdrong hơgei tơlĕch jang ‘nao, mă iĕ ioch mă lei đei jơnei tơpă, tơgăl ăn anih jang gah bri kơ jơ̆p teh đak hŏk ƀoi: “ ‘Nhŏng oh jang 2 tơdrong jang mă 2 sơleng kơ đon. Flycam vang jang vei lăng bri. Mă 2 noh ‘lơ̆ng hloh, rim kan ƀô̆ hơlen bri kai minh phân mêm lơ̆m điê̆n thoăi di đŏng, rim bơngai athei năm hơlen tôm 120km lơ̆m 1 khei, bơngai yơ yak hơlen hơla noh đei lăng ưh keh đang sơnong jang đei pơjao, ƀônh ƀŏ đĕch lah. Dôm tơdrong tơlĕch jang iĕ ioch thoi noh pơtơm ăn kơ bơ̆n pơm jang tơnăp hloh, pơtăl kơ chă apinh iŏk thim bơngai jang, bơ̆n athei tơplih đon tơchĕng noh gô trŏ ƀlep hloh”

Phŏ thủ tướng Trần Lưu Quang adoi tơroi, Jơnŭm pơgơ̆r teh đak tŏk bŏk pơgơ̆r tơplih 4 Tơchơ̆t tơrĕk truh tơ̆ bri. Kiơ̆ đơ̆ng chă hơlen tơpă tơ̆ tơring, anih jang, Phŏ thủ tướng ƀôh hơdah, tơdrong chih iŏk nơ̆r tơgop oei pơgia la. Phŏ thủ tướng athei Anih tơm Choh jang xa păng Hơtŏk tơring tơrang jang atŭm kơjăp hăm rim tơring, rim anih jang dah hrôih keh đang, pơtruh ăn Jơnŭm pơgơ̆r teh đak hơmet tơplih dôm Tơchơ̆t. Kiơ̆ đơ̆ng noh, gô sek tơlang keh kong lơ tơdrong gah vei lăng hơtŏk, tang găn păng pĭt unh xa bri, mă kăl noh tơdrong pơjing pơyua ăn mŭk drăm đơ̆ng bri kơdrơ̆ng.

Hăm rim tơring, Phŏ thủ tướng Trần Lưu Quang pơkăl ưh gơh pơhơi, rim ƀĭ thư, kơdră kơ dôm dêh char athei kơchăng tơnăp sơnong jang kơ bơngai chĕp kơ̆l. Atŭm hăm noh, athei kơchăng, tơnăp hloh, ưh hơdrô̆ oei gô jên asong đơ̆ng trung ương ôh.