Khei ‘năr âu ki, tơdrong teh, tơmo hơlih, tơ̆ Tây Nguyên pơm ăn hiong răm kơtang găh hơkâu jăn, mŭk tơmam kon pơlei. Tơdrong tơm pơm ăn lơ ‘măng teh hơlih tơ̆ dôm tơring khei ‘năr âu ki, mă loi ‘noh jĭ tơ̆ tơring Tây Nguyên hlôi đei Phŏ Kơdră Anih tơm vei lăng găh mŭk drăm păng cham char Lê Công Thành tơblang hơdăh lơ̆m ‘măng hop akŏm Khŭl kơdră teh đak khei 7. Tơroi 1, 2 tơdrong tơm pơm ăn teh hơlih, Phŏ Kơdră Anih tơm vei lăng găh mŭk drăm păng cham char Lê Công Thành tơblang hơdăh, hăm dôm jih kông, kŭm hăm tơdrong tơplih đơ̆ng teh bri jing teh pơtăm ‘long dăh mă chưk tơhnă teh pơm hnam, trong... hơnhăk truh hơmơt kơ teh hơlih mư̆h đei ‘mi tih. Đei ƀôh đơ̆ng teh hơlih ‘noh jĭ ‘mi lơ năr, ‘mi tih; đei ƀôh hơnih hơđang tơ năr hnam, jih kông; teh pông, teh tơdrŏ....

Mưh đei dôm tơdrong đei ƀôh âu, Kon pơlei kăl kơ răp hơlen lăng kơtơ̆ng ang tơ roi tơbăt hơdrol ‘mi đak tih, teh hơlih, roi tơbăt ăn khŭl kơdră păng dôm bơngai jum dăr. Dôm khŭl linh tơring kăl kơ răp hơlen păng pơgơ̆r pôk rĭ tơdăh đei hơmơt ‘mi tih, kăl kơ vei lăng hơkâu jăn hơdrol. Ƀok Lê Công Thành roi tơbăt hơdrol, pơyan ‘mi kial hơbŭt ‘nao pơtơm, tơdra hơdrol ‘mi kial đak tih oei hơnơ̆ng đei ƀôh krê hơmơt, gô pơm ăn dôm hiong răm ưh kơ ê. Thủ tướng teh đak kŭm hlôi đei hla ar pơgơ̆r athei dôm dêh char tơring Tây Nguyên hơnơ̆ng răp hơlen, dăr lăng, hơmet pơ ‘lơ̆ng.